Япон Улс үндэсний болон эдийн засгийн аюулгүй байдлаа хамгаалах үүднээс 2026 оноос эхлэн үл хөдлөх хөрөнгө эзэмших хүсэлтэй иргэдэд иргэний харьяаллаа заавал баталгаажуулах шаардлага тавихаар боллоо. 

Ерөнхий сайд Санаэ Такаичигийн Засгийн газрын хэрэгжүүлж буй энэхүү шинэ журмын дагуу үл хөдлөх хөрөнгө худалдан авагчид өөрийн иргэншлээ албан ёсоор мэдээлэх үүрэг хүлээх бөгөөд ингэснээр тус улс дотоодын зах зээл дэх гадаадын иргэдийн эзэмшилд бүрэн хяналт тавих боломж бүрдэх юм.

Хувь хүний мэдээллийн нууцлалыг хангах үүднээс иргэншлийн мэдээллийг нийтэд нээлттэй бүртгэлд харуулахгүй байхаар зохицуулсан бөгөөд өмнө нь хөрөнгө эзэмшсэн иргэдийн хувьд дахин бүртгүүлэх эсэх нь сайн дурын үндсэн дээр байх аж. 

2024 оны төсвийн жилд Японд хийгдсэн нийт үл хөдлөх хөрөнгийн худалдан авалтын 3.1 хувийг гадаадын иргэд болон аж ахуйн нэгжүүд бүрдүүлсэн байна.