Токио хот дэлхийн хотуудын сонирхол татах чансааг тогтоодог Global Power City Index (GPCI) 2025 судалгаагаар түүхэндээ анх удаа хоёрдугаар байрт шалгарлаа. Уг чансааг Японы Мори Мемориал сангийн Хотын стратегийн хүрээлэн жил бүр гаргадаг бөгөөд дэлхийн томоохон хотуудын хүн ам, хөрөнгө оруулалт, бизнес, аялал жуулчлалыг татах чадварыг үнэлдгээрээ нэр хүндтэйд тооцогддог.

Энэ удаагийн чансаагаар Лондон хот нэгдүгээр байраа хадгалж, Токио хоёрдугаар байрт орсон бол Нью-Йорк хот өмнөх хоёрдугаар байрнаас гуравдугаар байр руу ухарсан байна. Токио хот өмнө нь есөн жилийн турш дараалан гуравдугаар байрт бичигдэж байсан бөгөөд ийнхүү нэг байр ахисан нь чухал амжилтад тооцогдож байна.

Судалгаанд дэлхийн 48 хотыг эдийн засаг, судалгаа хөгжүүлэлт, соёлын харилцаа, амьдрах орчин, байгаль орчин, хүртээмж тээвэр гэсэн зургаан үндсэн үзүүлэлтээр үнэлжээ. Эдгээр шалгуур нь хотуудын өрсөлдөх чадвар, олон улсын “татах хүч”-ийг илэрхийлдэг байна.

Токио хот амьдрах орчны чанараар дэлхийд нэгдүгээр байрт орж, соёлын харилцаа болон аялал жуулчлалын үзүүлэлтээр хоёрдугаар байранд бичигдсэн нь нийт оноог мэдэгдэхүйц өсгөсөн байна. Аюулгүй байдал, нийтийн үйлчилгээ, хотын дэд бүтэц, тээврийн хүртээмж өндөр үнэлэгдэж, олон улсын жуулчдын тоо нэмэгдсэн нь ч мөн эерэг нөлөө үзүүлжээ.

Судалгааны дүнгээс харахад Зүүн Азийн хотуудын өрсөлдөх чадвар нэмэгдэж, харин Европ, Хойд Америкийн зарим хотууд инфляц, амьжиргааны өртгийн дарамтаас шалтгаалан оноо алдаж байгаа нь ажиглагджээ.