Улаанбаатар хотын орон сууцны зах зээлд үнийн өсөлт үргэлжилсээр байна. 2025 оны 11 дүгээр сарын байдлаар нийслэлийн хэмжээнд шинэ болон хуучин орон сууцны дундаж үнэ нэг м.кв нь 4.97 сая төгрөгт хүрчээ.

Орон сууцны үнийн индекс өмнөх оны мөн үетэй харьцуулахад 12.7 хувиар өссөн байна. Үүнээс хуучин орон сууцны үнэ 13.9 хувь, шинэ орон сууцны үнэ 11 хувиар тус тус нэмэгджээ.

Дүүргээр нь авч үзвэл, Сүхбаатар дүүрэгт орон сууцны үнэ хамгийн өндөр хэвээр байгаа бөгөөд шинэ орон сууц нэг м.кв нь дунджаар 5.9 сая төгрөг, хуучин орон сууц 5.95 сая төгрөгийн үнэтэй байна.

Харин үнийн өсөлтөөрөө Хан-Уул дүүрэгт хуучин орон сууц хамгийн өндөр өсөлттэй байгаа бөгөөд өмнөх оноос 18.8 хувиар нэмэгджээ. Баянгол дүүрэгт өсөлт харьцангуй бага буюу 10.2 хувь, Сонгинохайрхан дүүрэгт шинэ орон сууцны үнэ 6.9 хувь, харин Чингэлтэй дүүрэгт 0.2 хувийн өсөлт ажиглагдсан байна.

Салбарын судалгаагаар орон сууцны үнэ 2023 оноос хойш тасралтгүй өсөж, ялангуяа 2024 оны дундаас эхлэн өсөлт эрчимжсэн нь эрэлт, өртөг, санхүүжилтийн нөхцөлтэй шууд холбоотойг онцолжээ.