Их Британид тансаг ангиллын буюу 2 сая фунт стерлингээс дээш үнэтэй орон сууцны зах зээлд ойрын жилүүдэд мэдэгдэхүйц уналт ажиглагдах төлөвтэй байна. Үл хөдлөх хөрөнгийн зуучлалын “Hamptons” компанийн тооцоолсноор 2028 оноос эхлэн тус ангиллын орон сууцны үнэ жилд дунджаар 5 хувиар буурч, 2009 оноос хойших хамгийн огцом уналтыг үзүүлэх магадлалтай байна.

Энэхүү төлөвийн гол шалтгаан нь Их Британийн Засгийн газраас 2028 оноос хэрэгжүүлэхээр төлөвлөж буй шинэ татварын бодлоготой холбоотой. Тодруулбал, 2 сая фунт стерлингээс дээш үнэтэй орон сууц эзэмшигчдэд жил бүр 2,500–7,500 фунт стерлингийн нэмэлт татвар ногдуулах юм. Энэ нь өндөр үнэтэй үл хөдлөх хөрөнгө эзэмших зардлыг өсгөж, хөрөнгө оруулагчдын сонирхлыг бууруулах эрсдэлтэй гэж шинжээчид үзэж байна.

“Hamptons” компанийн мэдээлснээр энэхүү өөрчлөлт нь зах зээлийг илүү тэнцвэртэй болгох, тансаг ангиллын үл хөдлөх хөрөнгийн үнийн хэт өсөлтийг сааруулах зорилготой ч богино хугацаанд үнэ буурах, арилжааны идэвх сулрах нөхцөл үүсгэх магадлалтай байна. Үүний зэрэгцээ зарим хөрөнгө оруулагчид татвар хэрэгжихээс өмнө үл хөдлөх хөрөнгөө худалдах хандлага нэмэгдэх эрсдэлтэйг мөн онцолжээ.