Сар тутмын Барилга МН сэтгүүлийн 2025 оны сүүлийн дугаар буюу 12 дугаар сарын дугаар уншигчдадаа хүрч эхэллээ. 187 дахь дугаарын нүүр хуудсандChokwang paint  mongolia компани хамтран ажиллаа. 

Энэ сарын онцлох булангуудаас танилцуулбал, 

VIP ярилцлага: Г.Болормаа: Зураг төсөл нь төсөвт багахан хувь эзэлдэг ч барилгын нийт өртөгт хамгийн их нөлөөлдөг хэсэг юм

Энэ сарын дугаартаа ЭМ ЭС ЭЛ  ХХК - ийн гүйцэтгэх захирал, зөвлөх архитектор Г.Болормааг онцолж, VIP ярилцлагадаа урьж ярилцлаа. Тэрээр барилгын салбартаа 17 жил ажиллаж байгаа бөгөөд 2015 онд зураг төслийн компаниа байгуулан ажиллаж байгаа бөгөөд энэ жил тус компанийн 10 жилийн ой нь тохиож буй. Түүний барилгын салбарт хэрэгжүүлсэн төслүүд, ажлын туршлага, үзэл бодол, зураг төслийн салбарын хөгжил дэвшлийн талаар ярилцсаныг хүлээн авч уншина уу. 

Миний түүх: Т.Оюун-Эрдэнэ: Монгол гэрээ трэнд болгож банкны зээлгүйгээр амьдарч болох юм шүү гэдгийг олон хүнд мэдүүлмээр байна

“Мордож буй улаан дээлтэй өвгөн 

Монголын их амар амгалан

Морины хөлөөс чөдөр уйдаж

Шөнийн талд гуних

Монголын их амар амгалан…”  

— Монгол Улсын Төрийн соёрхолт, Соёлын гавьяат зүтгэлтэн зохиолч, яруу найрагч Ц.Бавуудорж

Энэ мөрүүд Монгол хүний сэтгэлийг мялаах, амар амгалан, тал хээр, байгаль, эх орон руугаа тэмүүлдэг дотоод чин хүслийг сэрээх үг мэт мэдрэмж оргилон байж энэ удаагийн Миний түүх булангийн зочинтойгоо ярилцлаа. Хүний газар боломж хайж нутгаасаа гарсан ч, эцэст нь амьдралын жинхэнэ утга учир нь эх орон, элгэн саднаасаа холдохгүй гэдгийг түүний түүх өгүүлнэ.

Судалгаа: Бага орлого, өндөр түрээс - Түрээсийн туйлшралын бодит байдал

Энэ буландаа Улаанбаатар хотын орон сууцны зах зээлийн түрээсийн үнэ, хүн амын динамик, орлогын харилцан хамаарлын талаарх судалгааг хүргэж байна. Өрхийн орлого байр түрээслэхэд хүрэлцэхээр байгаа юу?... 

Нийтлэл: Монголын архитектурын өв болох сүм, хийдийн уран барилгыг сэргээх нэрийдлээр устгах, барилгын засвар хийхээ болих хэрэгтэй

Цагийн хүнд бэрхийг туулж, эрс тэс уур амьсгалын байнгын нөлөөлөлд автаж, элэгдэж муудсан сүм хийдийн уран барилга хөөрхийлөлтэй хувь тавиланг туулж байна. Төр засаг нь анхаардаггүй, орон нутаг нь хайхардаггүй. Хаа нэгтээ хэдэн сүмийг сэргээн засварлахаар болоход ЦОО ШИНЭ болгочихно. Нэр томьёоны буруу нэршил нь сүүлдээ үйлдлийн хазгай болж байна. Соёлын өв болсон сүм хийдийн уран барилгын дурсгалыг сэргээн засварлалт нэрийдлээр БАРИЛГЫН ЗАСВАР ХИЙДЭГ болсон байна. Энэ удаагийн дугаартаа уг сэдвийн хүрээнд хөндөн бичлээ 

Архитектур дизайн: Түүх, технологийн уулзвар

Гизагийн пирамидын сүүдэрт эртний соёл ба орчин үеийн архитектур, инженерчлэлийн гайхамшгийг хослуулсан бүтээл сүндэрлэсэн нь Grand Egyptian Museum /GEM/. 2025 оны 11 дүгээр сарын 1- нд албан ёсоор нээлтээ хийсэн энэхүү гайхалтай барилгын талаар Архитектур дизайн буландаа онцоллоо. 

Дуулгах сонин: Шинэ жилийн баярын гайхамшиг

Шинэ жил айсуй. Энэ мөчид дэлхийн өнцөг булан бүрд өвлийн хүйтнийг үл ажран, аз жаргалаар дүүрдэг. Хотуудын гудамж өнгө өнгийн гэрлээр солонгорч, хонхны жингэнэх дуу хангинаж, хүмүүсийн нүүрэнд инээмсэглэл тодрох нь энэ сарын ид шид гэлтэй. Тиймээс 12 сарын дугаартаа дэлхийн өнцөг булан бүрд тохиох шинэ жилийн ид шидийг уншигч танд онцгойлон хүргэхээр бэлдлээ. Дурсамж төсөөлөлдөө умбан уншихыг хүсье.

Түүнчлэн Барилга МН сэтгүүлээс шинэ орон сууцны үнэ ханш, ажил гүйцэтгэх үнэлгээ, барилгын материалын үнэ ханшийг шинэчилсэн байдлаар харах боломжтой. 

СЭТГҮҮЛ ЗАХИАЛАХ 

Утас: 9100-0233, 7711-3333