Нийслэлийн Иргэдийн Төлөөлөгчдийн Хурал 2026 онд хэрэгжүүлэх төсөвтөө хотын дэд бүтэц, инженерийн барилга байгууламжийг сайжруулах зорилгоор 477.7 тэрбум төгрөгийн хөрөнгө оруулалт тусгасан байна. 

Тус хөрөнгө нь нийслэлийн инженерийн шугам сүлжээний шинэчлэл, авто зам болон гудамж талбайн өргөтгөл, нүхэн болон гүүрэн гарцын засвар, ус дулаан хангамжийн бүтээн байгуулалт зэрэг зайлшгүй шаардлагатай ажилд зориулагдахаар төлөвлөгджээ.

Энэ нь сүүлийн жилүүдэд эрчимжиж буй хүн амын төвлөрөл, хотын ачаалал нэмэгдсэнээс үүдэлтэй дэд бүтцийн доголдлыг бууруулах, иргэдийн амьдрах орчны чанарыг дээшлүүлэх зорилготой гэдгийг НИТХ-аас онцолсон байна. 

Төсвийн хүрээнд зарим шинэ шугам сүлжээг татах, хуучирсан инженерийн байгууламжийг сэргээн засварлах, мөн аюулгүй ажиллагааг хангах чиглэлийн хөрөнгө оруулалт хийгдэхээр тусгагджээ.