Улаанбаатар хотын ногоон орон сууц төслийн хүрээнд баригдсан эхний ээлжийн 110 айлын эко орон сууц 2025 оны 11-р сарын 29-нд Сонгинохайрхан дүүрэгт ашиглалтад орлоо. Нийслэлийн утаа, түгжрэлийг бууруулах үндсэн шийдлүүдийн нэг нь орон сууцжуулалт гэж үзэж буй тул Засгийн газар орон сууцжуулалтын тухай хууль, үндэсний төлөвлөгөө боловсруулах, орон сууцжуулалтын банк байгуулах бэлтгэл ажлыг эхлүүлээд байна. 

Хот байгуулалт, Барилга, Орон сууцжуулалтын Яам холбогдох хуулийн төслүүдийг боловсруулж, ойрын хугацаанд УИХ-д өргөн барихаар төлөвлөжээ.

Уур амьсгалын ногоон сангийн буцалтгүй тусламж, Азийн хөгжлийн банкны хөнгөлөлттэй зээл, НЗДТГ-ын санхүүжилтээр хэрэгжиж буй энэ төслийн хүрээнд дэд төвүүдийг түшиглэн нийт 5000 айлыг ногоон орон сууцанд хамруулахаар төлөвлөсөн байна. Төсөл хоёр үе шаттай хэрэгжих бөгөөд эхний шатанд Баянхошуунд 462, Шархадад 338 айлын ногоон орон сууц барих юм. Эхний ээлжийн орон сууцанд эмч, багш нарыг нэн түрүүнд оруулахаар төлөвлөжээ. 

Таван жилийн өмнө Баянхошуу, Шархад орчмын 11 га газрыг чөлөөлж, орлогод нийцсэн ногоон орон сууц барих ажлыг эхлүүлсэн бөгөөд 2025–2026 онд 800 айлын орон сууцыг бүрэн ашиглалтад оруулж, 2030 он хүртэл нийт 4200 айлын хөтөлбөрийг хэрэгжүүлэхээр төлөвлөсөн байна.

Эко орон сууцанд саарал ус дахин ашиглах технологи нэвтрүүлсэн нь нийт усны хэрэглээг 30 хувиар бууруулах боломжтой. Хэрэглэсэн усыг зоорийн давхарт шүүж, суултуурын усаар ашиглах шийдлээр тоногложээ. Мөн нарны хавтан суурилуулж, дундын болон гадна гэрэлтүүлгийн цахилгааны хэрэглээг хангах бөгөөд энэ нь цахилгааныг 20 хүртэл хувиар хэмнэх боломжтой гэж үзэж байна. 

Уг ногоон орон сууц нь дөрвөн давхар хүлэмжтэй бөгөөд оршин суугчид жилийн турш хүнсний ногоогоо өөрсдөө тариалж хэрэглэх нөхцөл бүрдүүлжээ. Түүнчлэн барилгын дулаалгад гал дэмждэггүй, шилний орцтой хөөсөн материалыг Монголд анх удаа ашигласан нь барилгын аюулгүй байдал, дулаан хадгалалт, эдэлгээний чанарыг сайжруулсан шийдэл болсон байна.