Хонгконгийн Wang Fuk Court орон сууцны цогцолборт гарсан гал 8 блок орон сууцыг хамран өнөөдрийг хүртэл бүрэн унтраагүй байна. Түймрийн улмаас хамгийн багадаа 14 хүн амь үрэгдэж, 16 хүн шархадсан бөгөөд 31 давхар барилгын тал хувь нь галд автсан тухай албаныхан мэдээллээ. 

Галын хэмжээг хамгийн өндөр түвшин болох five-alarm fire  буюу “тав дахын анхааруулга” болгож зарласнаар нийт 128 автомашин, 800 гаруй гал сөнөөгч хүч нэмэн ажиллаж байгаа бөгөөд ойролцоох гол болон хурдны замуудыг бүрэн хаагаад байна.

Хонгконгийн Гал түймэртэй тэмцэх газрын дэд захирал Дерек Армстронг Чан “Барилгын доторх температур маш өндөр байгаа тул багийнхан давхар бүрээр орж ажиллах боломж хязгаарлагдаж, галыг хэзээ бүрэн унтраахыг урьдчилан хэлэх боломжгүй” гэж мэдэгджээ. 

Аврах ажиллагааны үеэр хоёр албан хаагч хүнд түлэгдсэн бөгөөд 37 настай гал сөнөөгч Хо Вай-хо амь үрэгдсэн байна.

Энэ гал нь Хонгконгийн сүүлийн хэдэн арван жилийн хамгийн ноцтой түймэр болж, 2,000 орчим айл, 4,800 оршин суугч бүхий цогцолборын бүхэл блокуудаар дамжин тархжээ.

Галын шалтгааныг тодруулахаар явуулж буй мөрдөн шалгалтаар барилгын гадна фасад болон дулаалгад амархан шатдаг материал ашигласан нь гал тархах гол хүчин зүйл болсон байж болзошгүй гэж үзэж байгаа бөгөөд уг хорооллыг барьсан барилгын болон зураг төслийн компанийн удирдлагуудыг баривчлан шалгаж эхэлжээ.