Монгол Улсын барилга угсралтын салбарын бүтэцт өөрчлөлт гарч байна. Үндэсний статистикийн хорооны мэдээллээр, 2025 оны III улирлын байдлаар нийт 382 тэрбум төгрөгийн үнэ бүхий худалдаа, үйлчилгээний зориулалттай барилгын ажил хийгдсэн байна. Энэ дүн өмнөх оны мөн үеэс 31.9 %-иар өссөн нь тус ангиллын барилгын салбар эрчимтэй тэлж байгааг харуулж байна.

Гэсэн хэдий ч үйлдвэрлэлийн зориулалттай барилгын угсралтын ажил сүүлийн гурван жил дараалан унаж, III улирлын байдлаар 17.4 %-иар буурсан байна.

Мөн энэ оны эхний есөн сард (I–IX) барилга угсралт, их засварын ажлын нийт гүйцэтгэл 8.8 их наяд төгрөг болж, өмнөх оны мөн үеэс 28.9 %-иар өссөн гэж мэдээлжээ. Уг бүтээн байгуулалтын ажлын 36.6 %-ийг орон сууцны барилга, 29.5 %-ийг орон сууцны бус барилга эзэлж байна.

Үл хөдлөх хөрөнгийн брокеруудын тайлангаас үзэхэд, худалдсан болон худалдан авсан үл хөдлөх хөрөнгийн ердөө 1 %-ийг үйлдвэрийн зориулалттай барилга эзэлжээ.

Барилгын салбарын хөрөнгө оруулалт, барилгажилтын чиг хандлага өөрчлөгдөж худалдаа, үйлчилгээний бүтээн байгуулалт эрс өссөн бол үйлдвэрийн зориулалттай барилга буурч байгаа нь зах зээлийн эрэлт ба зохицуулалтын тэнцвэрийн өөрчлөлтийг харуулж болох юм. Энэ хандлага нь Монголын эдийн засгийн хөгжлийн шинэ жишгийг тодорхойлж, барилга салбарын ирээдүйн боломж, эрсдлийг шинээр үнэлэхэд чухал ач холбогдолтой байгааг Санхүүгийн зохицуулах хорооны тайланд дурджээ.