Нийслэлийн Засаг дарга бөгөөд Улаанбаатар хотын Захирагч Х.Нямбаатар болон Улаанбаатар метро төслийн холбогдох албаныхан Бүгд Найрамдах Солонгос Улсын Эксим банкны төлөөлөгчидтэй уулзлаа.

Тус уулзалтад Эксим банкны Эдийн засгийн хөгжил, хамтын ажиллагаа хариуцсан дэд ерөнхийлөгч Үм Сүн Ён, Дэд бүтцийн санхүүжилтийн албаны захирал Ли Ки Сү нар оролцож, хамтын ажиллагааны хүрээнд хэрэгжиж буй төслүүдийн явц, цаашдын хамтын ажиллагааны чиглэлийн талаар санал солилцсон юм.

Уулзалтын үеэр Улаанбаатар метро төслийн хэрэгжилтийн явц, төслийн бэлтгэл ажлын талаар танилцуулсан бөгөөд төслийн техник, эдийн засгийн үндэслэл (ТЭЗҮ) болон концепц зураг төсөл бүрэн дууссан бөгөөд одоогоор байгаль орчин, нийгэмд нөлөөлөх үнэлгээг мэргэжлийн байгууллагууд хамтран гүйцэтгэж байна.

Энэхүү үнэлгээний ажлыг 2025 оны арванхоёрдугаар сард дуусгаж, төслийн зохицуулагч банк болох “JP Morgan Chase”-д хянуулна гэж хотын дарга Х.Нямбаатар онцлов. Тэрбээр мөн метроны бүтээн байгуулалтын ажлыг 2026 онд эхлүүлэхээр төлөвлөж буйг дурдав.

БНСУ-ын Эксим банк нь өмнө нь Панамa, Дакка, Каир зэрэг хотуудын метро болон LRT төслүүдэд санхүүжилт олгож, амжилттай хэрэгжүүлж байсан туршлагатай байгууллага юм.