2010 оноос хойш тасралтгүй хэвлэгдэн уншигчдадаа хүрч буй сар тутмын Барилга МН сэтгүүлийн 186 дахь дугаар уншигчдадаа хүрч эхэллээ. Энэ удаагийн нүүр хуудсанд Европийн алдарт эмульсний брэнд болох TOR PINTURAS хамтран ажиллаа. 

186 дахь дугаарын онцлох булангуудаас танилцуулбал,

Залуу инженер: Г.Сэргэлэн: Монгол Улсаа азийн Дубай болгоход гар бие оролцох нь миний мөрөөдөл 

Энэ удаагийн “Залуу инженер” буландаа Япон улсын барилгын салбарт амжилттай ажиллаж буй барилгын инженер Г.Сэргэлэнг урьж ярилцлаа. Тэрээр Японд ажиллах хугацаандаа төслийн менежмент, төлөвлөлт, баримт бичгийн удирдлага, чанарын баталгаажуулалт болон хяналт зэрэг барилгын инженерийн олон чиглэлд ажиллаж, төрийн захиалгат барилга байгууламж, усан онгоцны төв, орон сууц, сургууль зэрэг төрөл бүрийн төслүүдийг амжилттай хэрэгжүүлсэн туршлагатай.

Одоо тэрээр Японы үл хөдлөх, барилга угсралтын менежментийн Үэмура Группийн Дижитал шилжилтийн албанд ажиллаж, BIM (барилгын мэдээллийн загварчлал) болон хиймэл оюун ухаанд суурилсан дижитал шийдлүүдийг ашиглан төслийн үр ашиг, бүтээмжийг нэмэгдүүлэх чиглэлд ажиллаж байна.

Минийх түүх: Цамхагт кранист Мэндээ 

Барилгын салбарын мэргэжилтнүүдийн амьдралын түүхийг хуваалцдаг энэхүү буландаа цамхагт кранистаар 16 жил ажиллаж буй Мэндээгийн түүхийг хүргэж байна. Тэрээр Улаанбаатар хотынхоо өнгө төрхийг тодорхойлж буй олон сайхан хийцлэлтэй, өндөр архитектурын барилгуудад өөрийн гараар, сэтгэл зүрхээр оролцсоор барилцсаар, бүтээлцсээр ирсэн юм.

Мэргэжилтний үг: Хүйтэнд цутгасан бетоны процессын алдаа, гамшгийн суурь

"Монгол газрын тос боловсруулах үйлдвэр "ТӨХХК Технологийн хяналтын ахлах инженер, Зөвлөх инженер Б.Батхишигийн "Хүйтэнд цутгасан бетоны процессын алдаа, гамшгийн суурь" сэдвийн хүрээнд бэлтгэсэн мэргэжлийн нийтлэлийг хүлээн авч уншаарай. 

Нийтлэл: Сангийн далай хийдийн сэргээн засварлалтын суурь судалгаа

Монголын түүхэн дурсгалт барилга, архитектурын дурсгалын өнөөгийн байдал сэдвээр 2025 оны 1-р сарын дугаарт Өмнөговь аймгийн Номгон сумын Сангийн Далай хийд, түүний сум, дуганы өнөөгийн байдлын талаар өгүүлсэн билээ. Энэ дугаарт Сангийн Далай хийдийн сэргээн засварлалтын суурь судалгааны ажлын хүрээнд ямар судалгаа хийгдэж болох тэдгээрийн зарим үр дүнгээс дурдлаа. 

Архитектур дизайн: Орчин үеийн Хятадын архитектурын хаан ЛИУ ЖИАКУАН

Энэхүү буландаа алдарт архитектор Лиу Жиакуаны амьдрал, уран бүтээлийн талаар хүргэж байна. Тэрээр 1956 онд БНХАУ-ын Чэнду хотод эмчийн гэр гүлд төржээ. Бага насаа ээжийнхээ ажилладаг Христийн сүм болох Чэндугийн хоёрдугаар ардын эмнэлгийн хонгилд өнгөрсөн нь шашин шүтлэгт хүндэтгэлтэй ханддаг үзлийг багаас нь төлөвшүүлжээ. Лиу хүүхэд насандаа зураг зурах, уран зохиол судлах замаар ертөнцийг ойлгохыг эрмэлздэг урлагийн авьяастай хүүхэд байжээ. Түүний энэхүү авьяасыг санаандгүйгээр олж харсан нэгэн багшийн түүнд хандан хэлсэн урмын үг Орчин үеийн Хятадын архитектурын хаан хэмээн өргөмжлөгдөх замын эхлэл болсон түүхтэй.

Интерьер: Гэрээ “japandi” хэв маягаар тохижуулах 10 алхам  

Japandi interior буюу Японы интерьерийн чиг хандлага дэлхий даяар сүүлийн жилүүдэд хурдтай тархаж, олон улсад маш алдартай болж буй. Японы энгийн, тайван, байгальтай уялдсан  минималист хэв маягийг Скандинавын дулаан, тав тухтай интерьерийн хэв маягтай хослуулж эхэлснээр  олон хүмүүсийн сонирхлыг татаж байна. Тиймээс Европ, Хойд Америк, Ази, Австрали зэрэг олон бүс нутгуудад Japandi хэв маягаар гэрээ тохижуулах нь түгээмэл болсон. Энэ удаагийн дугаартаа энэхүү хэв маягаар гэрээ тохижуулах 10 алхмыг танилцуулж байна. 

Мөн Та Судалгаа, Шинэ материал, Технологийн дэвшил, Амины орон сууц булангууд, барилгын салбарт болсон хамгийн сүүлийн үеийн гадаад болон дотоод мэдээ мэдээллийг хүлээн авч уншаарай.

Түүнчлэн Барилга МН сэтгүүлээс шинэ орон сууцны үнэ ханш, ажил гүйцэтгэх үнэлгээ, барилгын материалын үнэ ханшийг шинэчилсэн байдлаар харах боломжтой. 

СЭТГҮҮЛ ЗАХИАЛАХ 

Утас: 9100-0233, 7711-3333