2025 оны 10-р сарын 16-нд Улаанбаатар хотноо Бүгд Найрамдах Хятад Ард Улсын буцалтгүй тусламжаар хэрэгжсэн “Ногоон нуур 1008 айлын орон сууц”-ны барилга байгууламжийг албан ёсоор хүлээлгэн өгөх ёслол боллоо.

Уг төслийг 2022 онд эхлүүлсэн бөгөөд гурван жилийн дотор 21 давхар 8 блок бүхий нийт 1008 айлын орон сууцыг чанарын өндөр түвшинд барьж дуусгасан байна. Барилгын бүтээн байгуулалт нь Монгол Улсын нийтийн орон сууцны хангамжийг нэмэгдүүлэх, иргэдийн амьдрах орчныг сайжруулах зорилготойгоор хэрэгжсэн юм.

Ёслолын арга хэмжээнд Монгол Улсын Хот байгуулалт, Барилга, Орон сууцжуулалтын яамны сайд Э.Бат-Амгалан, БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань нар оролцлоо.

Сайд Э.Бат-Амгалан арга хэмжээний үеэр хэлэхдээ:

“Энэ бол хоёр орны харилцааны бодит илэрхийлэл, олон жил ярьж, төлөвлөж ирсэн томоохон төсөл амжилттай хэрэгжсэнд баяртай байна. Монгол иргэдийн амьдрах орчинд чанартай, найдвартай орон сууц нэмэгдэж буй нь нийгмийн хөгжилд чухал хувь нэмэр оруулна” хэмээн онцолсон юм.

Элчин сайд Шэнь Миньжуань:

“Хятад, Монгол хоёр улс найрсаг харилцаатай, харилцан ашигтай хамтын ажиллагаатай гэдгийг энэ бүтээн байгуулалт нотлон харуулж байна. Бид цаашид ч ийм төслүүдээр хамтын ажиллагаагаа бэхжүүлж, ард түмний амьдралд бодит хувь нэмэр оруулахад анхаарч ажиллана” хэмээн тэмдэглэлээ.

Энэхүү орон сууцны цогцолбор нь Ногоон нуур орчимд баригдсан бөгөөд дэд бүтэц, авто зогсоол, хүүхдийн тоглоомын талбай зэрэг иж бүрэн шийдэлтэй орчин үеийн хороолол болж байгаагаараа онцлог юм.

Төслийг амжилттай хэрэгжүүлсэн нь Монгол, Хятадын хамтын ажиллагаа улам гүнзгийрэн хөгжиж, нийслэлийн иргэдийн амьдрах орчныг сайжруулах томоохон алхам болж байна.