Америкийн “InventWood” компани гангаас 10 дахин бат бөх, зургаа дахин хөнгөн “мод” зохион бүтээжээ. Энэхүү шинэ төрлийн модыг материал судлаач Лянбин Ху удирдан боловсруулж, олон жилийн судалгааны үр дүнд арилжааны бүтээгдэхүүн болгон худалдаанд гаргасан байна.

Лянбин Ху 10 гаруй жилийн өмнөөс модны бүтцийг дахин боловсруулж, улам бат бөх, хөнгөн болгох зорилготойгоор судалгаа хийж эхэлжээ. Мэрилэндийн их сургуульд ажиллаж байхдаа тэрээр модны байгалийн бүтцэд ордог лигнин хэмээх бүрэлдэхүүн хэсгийг хэсэгчлэн салгаж, целлюлозын нягтралыг сайжруулан бэхжүүлэх арга олсон байна.

Тусгай боловсруулалтын явцад модыг химийн уусмалд буцалгаж, эсийн түвшинд задлан, дараа нь халуун шахалтад оруулдаг. Энэ үйл явц нь бүтэн долоо хоног үргэлжилдэг бөгөөд үр дүнд нь гарсан мод нь металл, хайлшуудаас ч бат бөх болохыг “Nature” сэтгүүлд дурджээ.

Лянбин Ху 140 гаруй патент авч, технологио боловсронгуй болгосны дараа энэхүү “мод” -н материал зах зээлд гарсан байна. “InventWood” компанийн мэдээлснээр энэ материал нь мод шиг харагдаж, мод шиг хэрэглэгддэг ч улам хөнгөн, бат бөх бөгөөд барилгын бүтцийг хялбарчилж, газар хөдлөлтөд тэсвэртэй болгох давуу талтай гэжээ.