2025 оны Дэлхийн экспогийн хаалтын ёслол аравдугаар сарын 13-ны өдөр Япон улсын Осака хотын Юмешима хиймэл арал дээр амжилттай зохион байгуулагдлаа. Тус ёслолд Японы угсаа залгамжлах хунтайж Акишино, Ерөнхий сайд Ишиба Шигэрү болон олон улсын хүндэт зочид хүрэлцэн иржээ.

“Бидний амьдралд зориулсан ирээдүйн нийгмийг бүтээх нь” уриан дор энэ оны дөрөвдүгээр сард нээлтээ хийсэн тус экспод дэлхийн 158 улс орон, нутаг дэвсгэр, долоон олон улсын байгууллага оролцсон бөгөөд зургаан сарын турш олон нийтэд төрөл бүрийн сонирхолтой үзүүлэн, арга хэмжээг танилцуулсан байна.

Экспогийн эхний үед тасалбарын борлуулалт удаашралтай байсан ч эцэст нь нийт 25 сая хүн үзэж сонирхсон нь зохион байгуулагчдад 150–185 сая ам.долларын ашиг олох боломж бүрдүүлжээ.

Хаалтын ёслолын үеэр үзэсгэлэнгийн ололт амжилтыг түгээн дэлгэрүүлэхэд чиглэсэн форум зохион байгуулагдаж, оролцогч улс орнуудын төлөөлөгчид туг, далбаагаа намируулан парадад оролцсон байна. Мөн экспогийн бэлгэдэл “Мяку-Мяку” олны анхаарлыг татаж, орой нь ёслолын буудлага, дрон шоу үзүүлбэр болсны дараа арга хэмжээ 22:00 цагт өндөрлөжээ.