Дэлхий нийт эрчим хүчний хэмнэлт, тогтвортой хөгжил рүү эрчимтэй шилжиж буй энэ үед пассив, ногоон барилгын чиг хандлагыг тодорхойлсон  “Ногоон, Ухаалаг, Эрүүл барилга” олон улсын чуулга уулзалт 2025 оны 9 дүгээр сарын 20–22-ны өдрүүдэд БНХАУ - ын Хэбэй мужийн Гаобэйдиан хотод зохион байгуулагдлаа. 

Чуулга уулзалтыг БНХАУ-ын эрчим хүчний хэмнэлттэй цонх, хаалга, фасадны үйлдвэрлэлээрээ тэргүүлэгч Orient Sundar Group компани зохион байгуулав. 40 жилийн түүхтэй тус компани нь “Барилгыг илүү эрчим хүчний хэмнэлттэй болгож, амьдралын чанарыг сайжруулах” зорилгын хүрээнд инновац, технологийн шийдлүүдийг тасралтгүй хөгжүүлж, дэлхийн зах зээлд өргөжин ажиллаж байгаа бөгөөд олон улсын оролцогчдод пассив барилгын хамгийн сүүлийн үеийн инновац, технологиудыг танилцууллаа. 

 “Эрүүл орчныг бүтээж, урт наслахуй” уриа дор зохион байгуулагдсан уг чуулга уулзалтад АНУ, Монгол, Канад, Шинэ Зеланд зэрэг 20 гаруй орны 2500 гаруй мэргэжилтэн, салбарын тэргүүлэгчид нэгэн дор чуулж, пассив, ногоон барилгын хөгжил дэвшилтэй танилцаж, цаашдын чиг хандлагын талаар туршлага солилцлоо.

Тус чуулганд УИХ- ын гишүүн А.Ундраа, Монголын Барилгын Үндэсний Ассоциаци ТББ -ын гүйцэтгэх захирал Г. Батсүх, Барилга МН гүйцэтгэх захирал Д. Цолмонгэрэл, Монголын Ногоон барилгын хүрээлэн ТББ, “Гурван бухат” ХХК- ийн гүйцэтгэх захирал Т. Ганчимэг, IQP Italdesign LLC, Special Asset Management зэрэг төлөөлөгчид оролцлоо. 

Гурван өдрийн турш зохион байгуулагдсан уг чуулганы үеэр 

• АНУ, Канад, Шинэ Зеланд, Монгол зэрэг улсуудтай стратегийн хамтын ажиллагааны гэрээнүүд байгуулав. Тодруулбал, Барилга МН -ийн гүйцэтгэх захирал Д.Цолмонгэрэл Orient Sundar Group LLC- тай хамтын ажиллагааны гэрээ байгуулсан нь хоёр орны бизнесийн харилцааг өргөжүүлэх, ногоон барилгын технологийг нэвтрүүлэх, туршлага солилцох эхлэлийг тавиад байна. 

• Мөн олон улсын цаг агаарын байдал, эрс тэс уур амьсгалд зориулсан ногоон барилгын технологийн талаар оролцогч орны төлөөлөгчид, мэргэжилтнүүд туршлагаа солилцож, хэлэлцүүлэг өрнөв.

• Түүнчлэн бүтээгдэхүүний туршилт судалгааны лабораторийг танилцууллаа. Улс орон бүрийн цаг уурын нөхцөл өөр өөр байдаг учраас эрс тэс уур амьсгалд тэсвэртэй байдал, дуу чимээ тусгаарлалт, эрчим хүчний хэмнэлтийг хэрхэн шалгаж, баталгаажуулдаг талаараа  бодит туршлагаа олон улсын оролцогчдод сонирхууллаа.

• Мөн хамгийн сүүлийн үеийн инновац, ухаалаг шийдэл бүхий “Эрүүл сууц” болон “Модуль пассив байшин” - ийн загваруудыг танилцуулав. Тухайлбал, өндөр настнуудад зориулсан сууц нь хүний биеийн байдлыг хянах ухаалаг системтэй бөгөөд эрсдэл илэрвэл эмнэлгийн байгууллагатай шууд холбогдох технологийн шийдлийг суурилуулсан байна. 

Мөн дотоод агаарыг тогтвортой, цэвэр байлгах ухаалаг агааржуулалтын систем, орон зайг уян хатан өөрчлөх хөдөлгөөнт хана бүхий интерьерийн шийдэл танилцуулсан нь “ухаалаг амины орон сууц”-ны шинэ чиг хандлагыг тодорхойлсон үйл явдал байлаа.

Энэхүү чуулга уулзалтаар пассив барилга, эрчим хүчний хэмнэлттэй цонх, хаалга, фасадны шийдлүүдийн талаар оролцогч орнууд туршлага солилцож, уур амьсгалын онцлогт нийцсэн технологийг нутагшуулах, инновацыг хамтдаа хөгжүүлэх боломжийг нээсэн нь хамгийн том үр дүн байлаа.