“Visual Capitalist” байгууллагын судалгаагаар энэ онд түрээсийн үнэ хамгийн өндөр хотоор Нью-Йорк тодорсон бол, түрээсийн үнийн хамгийн их өсөлт Сингапур болон Дубай хотуудад бүртгэгджээ.

Нью-Йорк хотын төвд нэг өрөө байрны сарын дундаж түрээсийн үнэ 4,143 ам.доллар буюу ойролцоогоор 14,500,000₮ хүрч, таван жилийн өмнөхөөс 22 хувиар өссөн байна.

Жагсаалтын хоёрдугаарт Бостон орж, нэг өрөө байрны сарын дундаж түрээсийн үнэ 3,394 ам.доллар (ойролцоогоор 11,880,000₮) болж, 25 хувиар нэмэгджээ. Харин гуравдугаарт Сан-Франциско хот орсон бөгөөд тус хотод түрээсийн үнэ сүүлийн таван жилд ердөө 1 хувиар өссөн байна.

Мөн АНУ-аас гадна Сингапур 2020 оноос хойш түрээсийн төлбөр 55 хувиар нэмэгдэж, сарын дундаж үнэ 3,167 ам.доллар (ойролцоогоор 11,080,000₮) болсон нь жагсаалтын хамгийн өндөр өсөлт болжээ.

Европын хотуудаас Лондонд түрээсийн төлбөр 39 хувиар өсөж, 2,985 ам.доллар (ойролцоогоор 10,450,000₮) болсон бол Швейцарын Цюрих хотод 2,720 ам.доллар буюу 9,520,000₮, 35 хувиар өссөн ба Женев хотод 2,330 ам.доллар буюу 8,155,000₮, 20 хувиар өссөн нь орон сууцны түрээсийн төлбөр өндөр хотуудын жагсаалтад багтлаа.

Ойрх Дорнодын бүсээс Дубай хот түрээсийн төлбөр 54 хувиар нэмэгдэж, сарын дундаж үнэ 2,401 ам.доллар (ойролцоогоор 8,400,000₮) болж, бүс нутгийн хамгийн өндөр үзүүлэлт болсон байна.

Шинжээчид үнийн өсөлтийг орон сууцны хомсдол болон хүмүүсийн шилжилт хөдөлгөөнтэй холбон тайлбарлаж байна.