Улаанбаатар хотын хэмжээнд орон сууц болон албан байгууллагын нийт 8,524 лифт ашиглагдаж байна. Эдгээр лифтнүүдийн ашиглалтын хугацаа, чанар, аюулгүй байдалд нийслэлийн Хяналт шалгалтын газар шалгалт хийж, 150 лифт ашиглалтын шаардлага хангахгүй, 488 лифт өндөр эрсдэлтэй байгааг тогтоосон байна. 

Лифтний дундаж ашиглалтын хугацаа нь 20 жил бөгөөд эвдрэл гэмтэл гарвал тухайн байрны Сууц өмчлөгчдийн холбоо (СӨХ) цаг алдалгүй засаж, оршин суугчдын аюулгүй байдлыг хангах үүрэгтэй.

Гэвч оршин суугчдын СӨХ-ны төлбөрийн төлөлттэй холбоотойгоор засвар үйлчилгээг цаг хугацаанд нь хийх боломжгүй байгаагаас лифт ашиглалтын хугацаанаасаа өмнө эвдэрч, ашиглалтаас гарч байна. Энэ нь хүний амь нас, эрүүл мэндэд шууд нөлөөтэй тул холбогдох албаныхан иргэдэд СӨХ-ны төлбөрөө цаг тухайд нь төлөхийг анхааруулж байгаа юм. 

Нийслэлийн Хяналт шалгалтын газрын дарга С.Энхбаяр “Нийслэлийн Засаг даргын баталсан захирамжийн дагуу иргэдийн эрүүл аюулгүй орчинд амьдрах эрхийг хангах зорилгоор энэ жил хоёр удаа үзлэг, шалгалт хийсэн” бөгөөд шалгалтаар шаардлага хангахгүй болон өндөр эрсдэлтэй 488 лифт байгааг тогтоосон байна.

Үүний дагуу дүүргүүдийн Засаг дарга болон холбогдох СӨХ-д лифтнүүдийг шинэчилж, засах мэдэгдэл хүргүүлжээ. Мөн нийслэл болон орон нутгийн төсвийн хөрөнгөөр 2023 онд найман лифт, 2024 онд 35 лифтийг шинэчилсэн бөгөөд энэ онд 42 лифтийг шинэчилж байна.