Бүтээн байгуулагчдадаа үргэлж дэмжин ажилладаг барилгын салбарын төв хэвлэл Барилга МН сэтгүүлийн 10 дугаар сарын буюу 185 дахь дугаар уншигчдадаа хүрч эхэллээ. Энэ удаагийн нүүр хуудсанд Тоонот хаалга ХХК хамтран ажиллаа. 

185 дахь дугаарын онцлох булангуудаас танилцуулбал,

VIP ярилцлага: Импортын бүтээгдэхүүнээс зах зээлээ хамгаалах нь бидний хамгийн том зорилго 

Энэ удаагийн VIP ярилцлагадаа евро стандартаар эрдэс чулуун хөвөн дулаалга үйлдвэрлэж буй Евро базальт компанийн гүйцэтгэх захирал Ц.Алтаннавчийг урьж ярилцлаа. Тэрээр Тесо Пропертиз компанийн томоохон төслүүдийг удирдан ажиллаж байсан туршлагатай бөгөөд 2024 оноос эхлэн тус үйлдвэрийн гүйцэтгэх захирлаар томилогдон, үйлдвэрийн бүтээн байгуулалт, судалгаа шинжилгээ, туршилтын бүтээгдэхүүний үйлдвэрлэл гэх мэт үйл ажиллагааг хариуцан ажиллаж байна. 

Судалгаа: Зогсоолын асуудал бол тооны биш хандлагын асуудал 

Улаанбаатар хотод жолооч нар “зогсоол олдохгүй” хэмээн байнга бухимддаг. Түгжрэлийн дараа хамгийн их бухимдал дагуулдаг зүйл бол автомашины зогсоол. Гэвч үнэндээ зогсоол үнэхээр хүртээмжгүй байна уу? эсвэл бид зогсоолоо зөв ашиглаж чадахгүй байна уу?

2025 оны байдлаар Улаанбаатар хотод бүртгэлтэй автомашины тоо 600 мянгад дөхсөн ч, нийтдээ 113 мянга гаруй авто зогсоол бүртгэлтэй байна. Нийслэлийн төвийн бүсээр өдөрт 100–120 мянган автомашин хөдөлгөөнд оролцож байгаа нь зогсоолын тоо зарим талаараа боломжийн байж болохыг илтгэнэ.

Тэгвэл яагаад “зогсоол олдохгүй” гэсэн гомдол тасардаггүй вэ? Энэхүү нийтлэлээр бид энэ асуултад хариулт хайх бөгөөд зогсоолын асуудлыг зөвхөн тоо хэмжээний хүрэлцээ биш, харин хэрэглээний хандлага, менежмент, зохион байгуулалтын уялдаа зэргээс шалтгаалсан цогц асуудал болохыг шинжилж, бодит шийдэлд хүрэх гарцыг эрэлхийлэх болно. 

Архитектур дизайн: Архитектурын яруу найрагч Тадао Андо 

Хоосон орон зай бол мэдрэмжийн тайлбар, ухаарлын эхлэл. Энэ үгс бол зөвхөн уран илэрхийлэл биш. Энэ бол архитектор Тадао Андогийн бүтээлийн мөн чанар, сэтгэлгээний төв цэг юм.

Тадао Андо бол орчин үеийн архитектурын тайван боловч хүчирхэг дуу хоолой. Японы Осака хотод 1941 онд мэндэлсэн тэрээр архитектурын албан ёсны боловсролгүй ч, өөрийн хичээл зүтгэл, судалгаа, сонирхлоороо дэлхийн хамгийн нэр хүндтэй архитекторуудын нэг болж чадсан онцгой хувь хүн юм. Боксчны амьдралаас бүтээлч сэтгэгчийн зам руу эргэлт хийсэн түүний амьдрал, уран бүтээлийг энэхүү буландаа онцоллоо. 

Амины орон сууц: Эрчим хүчний хэмнэлттэй 103 м2 жишиг амины орон сууц

Эрчим хүчний хэмнэлттэй 103 м2 жишиг амины орон сууцны архитектур төлөвлөлтийн талаар зөвлөгөө мэдээллийг бэлтгэлээ. 

Нийтлэл: Барилгын салбарын даатгалын төрлүүд 

Даатгал гэж юу вэ? Даатгал нь хувь хүн болон байгууллагын амьдрал, үйл ажиллагаанд тохиолдож болзошгүй санамсаргүй эрсдэлээс үүдэх санхүүгийн хохирлыг бууруулах, нөхөн сэргээхэд чиглэсэн үр дүнтэй хэрэгсэл юм. Энэ нь даатгагч болон даатгуулагчийн хооронд эрх зүйн үндэслэлтэйгээр байгуулагдсан гэрээний харилцаанд тулгуурладаг. Энэхүү нийтлэлээр бид барилгын салбар дахь даатгалын төрлүүдийн талаар болон тэдгээрийн онцлог, ач холбогдлыг авч үзэх болно.

Мөн Та чадна, Судалгаа, Мэргэжилтний үг булангууд,  барилгын салбарт болсон хамгийн сүүлийн үеийн гадаад болон дотоод мэдээ мэдээллийг хүлээн авч уншаарай. 

Түүнчлэн Барилга МН сэтгүүлээс шинэ орон сууцны үнэ ханш, ажил гүйцэтгэх үнэлгээ, барилгын материалын үнэ ханшийг шинэчилсэн байдлаар харах боломжтой. 

СЭТГҮҮЛ ЗАХИАЛАХ 

Утас: 9100-0233, 7711-3333