Монголын амины орон сууцны инновац хөгжлийн төвийн гүйцэтгэх захирал, Эрчим хүчний аудитор, Canadian Institute of Energy Training Эрчим хүчний хэмнэлтийн мэргэжилтэн А.Отгончимэг 

Эрчим хүчний хэмнэлттэй амины орон сууцны дулаалга,  хашлага бүтээц нь эрчим хүчний үр ашигт хамгийн чухал нөлөөтэй. Эрчим хүчний хэмнэлттэй амины орон сууц барихын тулд юун түрүүнд барилгын дулаан хамгаалалтын стандартын шаардлага, тухайн эрчим хүчний хэмнэлттэй амины орон сууцанд ашиглагдаж буй эрчим хүчний хэмнэлттэй технологийн шийдлүүдийн техник эдийн засгийн үзүүлэлт зэргийг барилга архитектурын зураг төсөлд тусгах нь хамгийн эхний алхам юм. Түүний дараагаар барилга баригдаж байх явцад зураг төсөлд тусгасан материалын түүвэр, хашлага бүтээцийн дулаалга, дулааны гүүр зэргийг сайтар битүүмжлэх нь эрчим хүчний хэмнэлттэй амины орон сууцны гол шалгуур үзүүлэлт болно. 

Энэхүү эрчим хүчний хэмнэлттэй амины орон сууцны хийцлэлийн хувьд евро хөнгөн блокоор зурагдсан зураг төсөл юм. Иргэд амины орон сууцаа блокоор хамгийн их барьдаг. Блокон байшин нь зундаа сэрүүн, өвөлдөө дулаан алдагдалгүй тав тухтай төдийгүй барилгын насжилт урт байдаг. Блокоор байшингаа барих гэж байгаа бол юун түрүүнд өөрийн газрын онцлог , хөрсний шинж чанараа  мэдэж шинжилгээ хийлгэх нь чухал. Намаг, цэвдэгтэй, хөрсний устай газар блокоор байшин барих тохиромжгүй. Блок болон хүнд хийцлэлтэй цутгамал барилга баривал хагарал цуурал, барилгад суулт өгч барилга нурах эрсдэлтэй. Иймд энэхүү зураг төслийн хийцлэлээр байшин барих бол хөрсний онцлогоо судалж шийдвэр гаргах нь оновчтой. 

“Евроблок” нь хөнгөн, бат бэх, тэгш гадаргуутай, дулаан хадгалах чадвар сайн, суулт өгдөггүй, гал дэмждэггүй, орчин  үеийн  дэвшилтэт  технологийн дагуу үйлдвэрлэгдэж буй бүтээгдэхүүн юм.  

Автоклавт  жигнэж  бэхжүүлсэн  энэхүү  бүтээгдэхүүн  нь  амины орон сууц, орон  сууц, үйлдвэр, сургууль, эмнэлэг, зочид буудал гэх мэт иргэний болон үйлдвэрлэлийн зориулалттай  барилга байгууламжийг барихад өргөн ашиглагддаг. 

Бүтээгдэхүүний үндсэн найрлагад кварцын агууламжтай элс, шатаасан шохой, цемент, гөлтгөнө, хөнгөн цагааны нунтаг ордог.

Эрчим хүчний хэмнэлттэй амины орон сууцны архитектур төлөвлөлтөд барилгын хийцлэл, технологи, ахуйн техник гэсэн гурван үндсэн хүчин зүйлийг зохистой, үр ашигтайгаар төлөвлөдөг. Тийм учраас хамгийн чухал нь мэргэжлийн байгууллагаар эрчим хүчний хэмнэлттэй амины орон сууцны зураг төслийг хийлгэвэл зохино.

ЦОНХ: Бүх цонх, шилэн хана хаалгыг зурагт үзүүлсэн схемийн дагуу захиалгаар хийлгэх бөгөөд стандартын шаардлага хангасан, гадна талдаа хар саарал, дотор талдаа цагаан өнгийн рамтай, 3 давхар шилтэй, 5-н үүртэй, LOW E түрхлэгтэй, /Ar=90%/ аргон хийн дүүргэлттэй, төмөр голчтой, MULTI-TECH G хуванцар спейсэртэй шилэн багц байна.

●    Нарны цацраг нэвтрүүлэлт g=0.5 

●    Дулаан дамжуулалтын итгэлцүүр U value= 1.15 

●    Дулаан хөрвүүлэлтийн итгэлцүүр R value= 0.85 /БНбД 25-01-20 давуулан биелүүлнэ./ 

Цонхны тавцангийн доогуур хөөсөнцрөөр шахаж дулаална. Барилгын цонх хаалганы зай завсрыг тэлдэг хөөс силиконоор агаар ус нэвтрэхгүй болгож битүүмжлэнэ. 

ХААЛГА: Хаалганы эргэн тойронд 200 мм-с багагүй эрдэс хөвөн буюу чулуун хөвөн хавтангаар галаас хамгаалах зурвас гаргаж дулаална. 

ХАМАР ШАЛ: Шалыг зурагт заасан дугаар хэсэглэл хийцийн дагуу чанартай цутгаж гүйцэтгэнэ. Ариун цэврийн өрөөний шалны түвшин бусад хэсгээс 1.5см доор байна. 

ДЭЭВЭР: Барилгын дээврийн ус тусгаарлагч, дулаалга зэрэг материалууд нь 15 жилийн баталгаатай байна. Дээврийн бүтэц нь ус нэвтрэхээр бүрэн хамгаалагдсан байх шаардлагатай ба дээвэрт гарах салхивч сантехникийн хоолойнуудын дээвэртэй уулзах уулзварыг зурагт заасны дагуу ус нэвтрэхгүйгээр чанартай битүүмжлэлтэй хийж гүйцэтгэнэ. . 

Саравчийг метал квадрат төмрөөр барилгын дулаалгын материал хийгдэхээс өмнө төмөр бетон бүс бетон руу бэхэлж, хүчитгэж өгнө, 

ХАНА: Гадна ханын дулаалгын хөөсөнцөр материалыг 1000х500 хэмжээтэй бэлтгэж, тусгай зориулалтын цавуугаар нааж, дулаан дамжуулдаггүй хуванцар тэлэгчтэй боолтоор /мөөг/ технологийн дагуу сайтар бэхэлж өгнө. Тэлэгчтэй хуванцар мөөг нь 20 см-аас багагүй урттай байх ба хананд 5 см-аас багагүй гүнтэйгээр суулгаж бэхэлнэ. Хөөсөнцөр хоорондох зай завсрыг зориулалтын чигжээсээр чигжсэний дараа синтетик торыг нааж өгнө. Дулаалгын хөөсөнцрийг сонгохдоо гал дэмждэггүй /шатдаггүй/ хөөсөнцөр сонгоно. ОБЕГ-ын дэргэдэх лабораторийн туршилт, шинжилгээ хийгдэж, баталгаажсан хөөсөнцөр хавтан үйлдвэрлэгч байгууллагын хөөсөнцөр хавтанг ашиглах хэрэгтэй.