2025 оны 10-р сарын 2-нд Сөүл хотын захиргаа Апгүжон 3-р дүүргийг 70 давхар барилгатай, 5,175 өрхийн орон сууцны хороолол болгон дахин хөгжүүлэх төлөвлөгөөг баталлаа.

Одоогийн байдлаар тус хороололд 3,934 өрх оршин сууж байгаа бөгөөд шинэ төлөвлөгөөгөөр 5,175 өрхийн орон сууц болгон өргөтгөхөөр төлөвлөжээ. Үүний 641 нь нийтийн зориулалттай орон сууц байх юм.

Хорооллын төвд баригдах хамгийн өндөр хоёр барилга нь 250 метр буюу 70 давхар байх бол бусад нь 50-аас доош давхартайгаар баригдах юм.

Энэхүү төсөл нь 1976 онд ашиглалтад орсон “Хёндай” орон сууцны бүсийг хамарч байгаа бөгөөд нийт 360,000 м² талбайг эзэлдэг байгаа аж. Шинэ төлөвлөгөөнд 1 км урт явган гүүр барихаар төлөвлөж байсан ч өртөг өндөр байсан тул хасаж, оронд нь нээлттэй цэцэрлэгт хүрээлэн болон явган хүний замууд байгуулахаар болжээ.

Мөн энэ өдөр Мокдонг дүүргийн 1–3-р хэсгийн дахин төлөвлөлтийн төлөвлөгөөг баталж, нийт 47,000 гаруй өрхийг хамарсан “шинэ хот” бий болгохоор болсноо мэдэгдлээ.