Нийслэлийн Чингэлтэй болон Баянгол дүүргийн таван хороонд оршин суугаа 5000 гаруй өрхийг стандартын дагуу дулаалж, халаалтын зориулалтаар хийн түлш ашиглах боломжийг бүрдүүлжээ.

Шинэ хөтөлбөрийн хүрээнд шаардлага хангасан өрхүүдэд хийн халаагч төхөөрөмжийг нэг удаа үнэ төлбөргүй суурилуулж, мөн улиралд 900,000 төгрөгийн мөнгөн урамшуулал олгохоор шийдвэрлэсэн байна. Энэхүү дэмжлэгийг 2025-2026 оны өвөл хэрэгжүүлэх юм.

Нийслэл Улаанбаатар хотод одоогоор 200,000 гаруй өрх сайжруулсан шахмал түлш хэрэглэж байгаа бөгөөд агаарын бохирдлыг бууруулах зорилгоор эдгээрээс 32,000–50,000 өрхийг хийн халаалтын системд шилжүүлэх төлөвлөгөө хэрэгжүүлж байна.

Хөтөлбөрийн хэрэгжилттэй холбоотойгоор Монгол Улсын хийн түлшний жилийн хэрэглээ 46,000 тонноос 100,000 тонн хүртэл өсөх тооцоо гарчээ. Гаалийн ерөнхий газрын мэдээлснээр, 2025 оны 8 дугаар сарын байдлаар хийн түлшний импортын хэмжээ өмнөх сараас 26.4%-иар өссөн байна.

Хангамжийн хувьд, “Гор Газ” компани нь 4,800 м³ багтаамжтай агуулах барьж, халаалтын төхөөрөмжүүдийг суурилуулах ажлыг зохион байгуулж байгаа бол “Дашваанжил Газ” компани нийт хийн зах зээлийн 40 хувийг хангаж байна.

Энэ талаар Шингэрүүлсэн хийн холбооны Ерөнхийлөгч Жеймс Роукал тодруулахад:

“Иргэд хийн халаалтын талаар хангалттай мэдлэггүй байгаа тул тэдэнд мэдээлэл өгөх сургалт, зөвлөгөө чухал. Хөтөлбөрийг амжилттай хэрэгжүүлэхийн тулд төр, хувийн хэвшил, иргэд хамтран ажиллах шаардлагатай.” гэдгийг онцолжээ.