Улаанбаатар хотын гэр хорооллын бүсийн инженерийн дэд бүтцийн хөгжил, агаар, хөрсний бохирдлыг бууруулах зорилго бүхий ногоон орон сууцны төслийн хүрээнд Баянхошуу, Шархадны байршлуудад 5000 айлын орон сууц баригдаж байна. Баянхошууны 41.3 га талбайд 2816 айлын орон сууц, ногоон байгууламж бүхий цогцолбор төлөвлөгдсөнөөс эхний ээлжийн 110 айлын дөрвөн блок орон сууцны барилгын ажлыг дуусгаж, улсын комисст хүлээлгэн өглөө. 

Үлдсэн 150 айлын дөрвөн блок орон сууцны барилгын ажил 57 хувьтай, 76 айлын хоёр блок орон сууцны ажил 48 хувьтай үргэлжилж байгаа бол 126 айлын гурван блок орон сууцны бүтээн байгуулалт ирэх онд эхлэхээр төлөвлөгдсөн.

Харин Шархадны 19.2 га талбайд 2184 айлын орон сууц барихаар төлөвлөснөөс эхний ээлжийн 110 айлын дөрвөн блок орон сууцны барилгын ажил 99 хувийн гүйцэтгэлтэй байна. 

Мөн 152 айлын дөрвөн блок орон сууцны ажил 59 хувьтай, 76 айлын хоёр блок орон сууцны ажил 41 хувийн гүйцэтгэлтэй үргэлжилж байгаа юм.

Төслийн хүрээнд зөвхөн орон сууцны барилга баригдахаас гадна дэд бүтцийн хөгжлийг цогцоор нь шийдэж, дулаан, усан хангамж, эрчим хүчний хэрэглээнд ухаалаг, байгальд ээлтэй шийдлүүдийг нэвтрүүлж, EDGE ногоон барилгын үнэлгээний шаардлагад нийцсэн усны хэмнэлттэй технологийг ашиглах боломж бүрдэж байна.