Засгийн газар ирэх онд Ирээдүйн өв сангийн хөрөнгийг ашиглан орон сууцжуулах хөтөлбөрийг хэрэгжүүлэхээр төлөвлөж байна. Энэхүү хөтөлбөрийн хүрээнд орон сууцжуулалтын чиглэлээр үйл ажиллагаа явуулах дагнасан банк байгуулах бөгөөд эхний ээлжинд 80,000 өрхийг орон сууцжуулах зорилт дэвшүүлжээ.

Шинээр хэрэгжүүлэх хөтөлбөрийн хүрээнд олгох орон сууцны зээлийн хүү нь байршил, зорилтот бүлгээс хамааран жилд 6-13 хувийн хооронд хэлбэлзэхээр тооцогдож байна. Тухайлбал, гэр хороолол болон дэд төвийн бүсэд баригдах орон сууцны зээл харьцангуй бага буюу 6 хувийн хүүтэй байхаар төлөвлөж байгаа бол хотын төвийн бүсийн орон сууцны зээлийн хүү 13 хувьд хүрч болзошгүй байна.

Одоогийн байдлаар хөнгөлөлттэй нөхцөлтэй ипотекийн зээлд 137,841 иргэн хамрагдаж, нийт 9.9 их наяд төгрөгийн зээл олгогдсон бөгөөд энэхүү хөтөлбөр нь өмнөх бодлогын үр дүнг үргэлжлүүлэн өргөжүүлэх, орон сууцны хүртээмжийг нэмэгдүүлэх, мөн гэр хорооллыг үе шаттай шинэчлэх, дэд бүтцийн хөгжилд түлхэц үзүүлэхэд чиглэж байна.