2025 оны 9 дүгээр сарын 18–20-ны өдрүүдэд Улаанбаатар хотноо “Монгол, Хятадын Барилга, дэд бүтцийн хөрөнгө оруулалтын форум-2025” арга хэмжээ амжилттай зохион байгуулагдлаа. Арга хэмжээг Монголын Барилгын Үндэсний Ассоциаци (МБҮА) болон БНХАУ-ын Олон улсын гэрээлэгчдийн нийгэмлэг (CHINCA) хамтран зохион байгуулсан бөгөөд хоёр улсын төр, хувийн хэвшлийн төлөөллөөс бүрдсэн 500 гаруй хүн оролцсон томоохон чуулган болсон юм.

Форумаар хоёр улсын барилгын салбарын хамтын ажиллагаа, хөрөнгө оруулалтын боломжууд, дэвшилтэт техник технологи, стандарт, хууль эрх зүйн орчин болон төслүүдийн хэрэгжилтийн талаар өргөн хүрээний хэлэлцүүлэг, илтгэлүүд өрнөсөн юм.

Монголын Барилгын Үндэсний Ассоциаци (МБҮА) болон БНХАУ-ын Олон улсын гэрээлэгчдийн нийгэмлэг (CHINCA) хамтран тус арга хэмжээг зохион байгуулж, хоёр тал цаашдын хамтын ажиллагааг гүнзгийрүүлэх чиглэлээр санамж бичиг байгууллаа. 

Санамж бичигт:

• Форум, үзэсгэлэнг жил бүр зохион байгуулах,
• Барилгын салбарын хууль, дүрэм, техникийн стандартын талаар мэдээлэл солилцох,
• Гишүүн компаниудыг танилцуулах B2B уулзалтууд зохион байгуулах,
• Хамтарсан төсөл хөтөлбөр хэрэгжүүлэх,
• Хөрөнгө оруулалт, санхүүжилт татах чиглэлээр хамтран ажиллах зэрэг заалтууд багтжээ.

Форумыг Монгол Улсын Шадар сайд Т.Доржханд нээж, БНХАУ-аас Монгол Улсад суугаа Онц бөгөөд Бүрэн эрхт Элчин сайд Шэнь Миньжуань хоёр орны харилцаа, хамтын ажиллагаа гүнзгийрч буйг онцлон тэмдэглэв.

Арга хэмжээнд Хятадын 150 гаруй аж ахуйн нэгж, хөрөнгө оруулагч оролцож, өөрсдийн төслүүд, технологи, бүтээгдэхүүн үйлчилгээг танилцуулсан юм. 

Оролцогч байгууллагуудаас дурдвал:

• Shanghai Construction Group
• China Railway Signal & Communication Co., Ltd
• China North Industries Corporation
• China Machinery Engineering Corporation
• Beiben Trucks Group Co., Ltd
• Shaanxi Construction Engineering Corporation

Монголын талаас:

• “NCD Group”  хөрөнгө оруулалтын төслүүд
• “Гурван бухат групп”,“Арга билиг” төсөл
• “Барилгачин групп” Монгол-Хятадын барилгын материалын худалдааны гүүр
• “IDC Group” Хот төлөвлөлт, амьдрах орчны шинэчлэл төслүүдийг танилцууллаа.

Түүнчлэн “24 мега төсөл”, “Хүннү хот”, дэд бүтцийн хөгжлийн шинэ чиг хандлага, барилгын материалын үйлдвэрлэл, экспорт, стандарт, инновацийн шийдлүүдийг хэлэлцсэн нь форумын онцлох хэсэг байв.

Энэхүү форум нь Монгол Улсад хэрэгжих боломжтой томоохон төслүүдэд хөрөнгө оруулалт татах, дотоодын компаниудыг олон улсын түвшинд гаргах, техник технологийн шинэчлэл хийхэд чухал ач холбогдолтой үйл явдал боллоо.