Монгол Улсын Барилгын Үндэсний Ассоциаци (МБҮА) болон Бүгд Найрамдах Хятад Ард Улсын Олон Улсын Барилгын Гэрээлэгчдийн Нийгэмлэг (CHINCA) хамтран зохион байгуулж буй “Монгол, Хятадын Барилга, Дэд Бүтцийн Хөрөнгө Оруулалтын Форум” өнөөдөр Улаанбаатар хотноо амжилттай үргэлжилж байна.

Форум нь хоёр улсын барилгын салбарын мэргэжлийн байгууллагууд, хөрөнгө оруулагчид, бизнес эрхлэгчид, төрийн төлөөллүүдийг нэг дор цуглуулж, дэд бүтэц, бүтээн байгуулалт, технологи, хамтарсан төсөл, хөрөнгө оруулалтын боломжуудыг хэлэлцэж буй өндөр түвшний арга хэмжээ болж байна.

Хоёр талын хамтын ажиллагааны эхлэл болгож, Монголын Барилгын Үндэсний Ассоциаци болон CHINCA-ийн хоорондын Харилцан ойлголцлын санамж бичигт 2025 оны 9-р сарын 18-ны өдөр гарын үсэг зурсан бөгөөд энэ нь Монголын барилгын салбарын олон улсын чиг баримжааг нэмэгдүүлэх, экспортын чадавхыг өргөжүүлэхэд чухал түлхэц болохыг талууд онцоллоо.

Форумын хүрээнд Монголын барилгын компаниуд өөрсдийн төсөл, хөрөнгө оруулалтын саналуудаа танилцуулж, Хятадын хөрөнгө оруулагчидтай B2B уулзалтууд хийж байна. Түүнчлэн дэлхийн барилгын салбарын чиг хандлага, дэвшилтэт технологи, олон улсын стандартын талаар салбар хэлэлцүүлгүүд өрнөж, мэргэжлийн түвшинд туршлага, мэдлэг солилцож буй онцлогтой.

Форумын төгсгөлд хамтарсан төслүүдийн талаарх уулзалтуудын үр дүнг нэгтгэж, цаашдын хамтын ажиллагааны чиглэл, дараагийн алхмуудыг тодорхойлно.