Монголын Барилгын Үндэсний Ассоциаци ТББ (МБҮА) нь БНХАУ-ын Олон улсын гэрээлэгчдийн нийгэмлэг (CHINCA)-тэй албан ёсны хамтын ажиллагааг эхлүүлж, барилгын салбарын төсөл хэрэгжүүлэгчдийг холбох гүүр болон ажиллахаар боллоо. Санамж бичигт гарын үсэг зурах ёслол 2025 оны 9-р сарын 18-нд зохион байгуулагдав.

Санамж бичигт Монголын Барилгын Үндэсний Ассоциаци ТББ-ын Ерөнхийлөгч Н.Баярсайхан, БНХАУ-ын Олон улсын гэрээлэгчдийн нийгэмлэг (CHINCA)-ийн Ерөнхийлөгч Фан Чючен нар гарын үсэг зурсан бөгөөд энэхүү алхам нь хоёр байгууллагын олон жилийн үр дүнтэй хамтын ажиллагааны үргэлжлэл юм. Талууд 2017 оноос хойш “Олон улсын дэд бүтцийн хөрөнгө оруулалт, бүтээн байгуулалтын дээд хэмжээний форум” зэрэг арга хэмжээнд тогтмол хамтран оролцож, харилцан ойлголцлоо гүнзгийрүүлж иржээ. 

Арга хэмжээнд Хятадын талаас дэлхийн шилдэг 500 компанид багтдаг Shanghai Construction Group, China Railway Signal & Communication Co., Ltd, China North Industries Corporation, China Machinery Engineering Corporation, Beiben Trucks Group Co., Ltd, Shaanxi Construction Engineering Corporation зэрэг томоохон хөрөнгө оруулагчид, төсөл хэрэгжүүлэгчид оролцсон бол Монголын талаас энэхүү арга хэмжээнд МБҮА ТББ-ын Хүндэт Ерөнхийлөгч, “Макс Өргөө” ХХК-ийн захирал Д.Цэрэнжигмэд, Тэргүүн дэд ерөнхийлөгч, “Заг Групп” ХХК-ийн захирал Б.Нэмэхбаатар, Дэд ерөнхийлөгч, “NCD Групп” ХХК-ийн захирал Б.Хүрэлхүү, “Эко Констракшн” ХХК-ийн захирал С.Нямдаваа, “Эрэлт Импекс” ХХК-ийн захирал Д.Энхтөр, Нийслэлийн Нэгдсэн төслийн удирдлагын газрын дарга Б.Мөнхбаатар, “Ай Ди Си Ай” ХХК-ийн захирал Э.Ванчиндорж, “Гурван Бухат Групп” ХХК-ийн захирал Т.Ганчимэг, БарилгаМН ХХК-ийн гүйцэтгэх захирал Д.Цолмонгэрэл, “Дельта Лифт” ХХК-ийн захирал Г.Бат-Амгалан нар оролцож, харилцан санал солилцлоо. 

Хамтын ажиллагааны хүрээнд дараах чиглэлүүдийг хамарч ажиллахаар харилцан тохиролцсон байна:

• 2025 оны 9-р сард Улаанбаатар хотноо CHINCA & MNCA форум, үзэсгэлэн зохион байгуулах
• Барилгын хууль, дүрэм, стандарт болон хөгжлийн талаар мэдээлэл солилцох
• Гишүүн компаниудыг хооронд нь холбох, B2B уулзалт, бизнес форум зохион байгуулах
• Хамтарсан төсөл, хөтөлбөр хэрэгжүүлэх
• Сургалт, семинар, чадавхжуулах үйл ажиллагаа зохион байгуулах
• Барилгын салбарын хөрөнгө оруулалтыг татах, гадаадын санхүүжилтийг дэмжих

Мөн дээрх ажлуудыг тогтвортой, үр дүнтэй хэрэгжүүлэхийн тулд хамтарсан нэгж байгуулах асуудлаар харилцан ойлголцолд хүрсэн байна.

Ийнхүү энэхүү хамтын ажиллагаа нь дотоодын барилга, дэд бүтцийн салбарын компаниудад олон улсын зах зээлд гарч өрсөлдөх боломжийг бүрдүүлж, гадаадын хөрөнгө оруулалт, дэвшилтэт технологийг нутагшуулах суурийг тавьж байна. Мөн салбарын орчин үеийн хөгжил, чадавхыг нэмэгдүүлэхийн зэрэгцээ төсөл хэрэгжүүлэгч компаниудын санхүүжилтийн асуудлыг шийдвэрлэх, төслүүдийг амжилттай хэрэгжүүлэх шинэ боломжийг нээсэн чухал арга хэмжээ боллоо.