Японы Осака хотноо үргэлжилж буй Дэлхийн ЭКСПО 2025 үзэсгэлэн аравдугаар сард өндөрлөх гэж байна. Үзэсгэлэнгийн бэлгэ тэмдэг болсон “Grand Ring” нэртэй, дэлхийн хамгийн том модон архитектурын бүтээлийн нэг хэсгийг байнгын хэлбэрээр хадгалж, цэцэрлэгт хүрээлэн болгохоор шийдвэрлэжээ.

Экспогийн зохион байгуулагч талууд болох Японы ЭКСПО холбоо, Осака муж, хотын захиргаа болон бизнесийн төлөөлөл хамтран энэ талаар тохиролцсон бөгөөд байгууламжийн хойд хэсгийн 200 метр орчмыг анхны хэлбэрээр нь хадгалан, олон нийтэд нээлттэй байлгах юм. Үүнтэй зэрэгцэн, Осака хотын захиргаа тус байгууламж болон орчмын талбайг цэцэрлэгт хүрээлэн болгон хөгжүүлэх үүрэг хүлээжээ.

Засвар, арчилгаа, менежментийн нийт зардал ойролцоогоор 5.5 тэрбум иен буюу 37.5 сая ам.долларт хүрэх төлөвтэй байгаа бөгөөд энэ хөрөнгийг хотын төсвөөс гаргаж, мужийн захиргаатай хамтран хуваалцах, мөн улсын татаас болон хувийн хэвшлээс дэмжлэг авах боломжийг судалж байна. 

Анх энэ байгууламжийг хувийн хэвшлээр менежмент хийлгэхээр төлөвлөж байсан ч, барилгын материал болох модны байдлыг нарийвчлан үнэлэх шаардлага үүссэн тул хот өөрөө хариуцах шийдвэр гаргажээ.