2025 оны долдугаар сарын байдлаар Монгол Улсад ипотекийн зээлийн жилийн төлөвлөгөөний хүрээнд нийт 1.2 их наяд төгрөгийн санхүүжилт олгохоор тусгагдсан ч бодит байдал дээр олгогдсон зээлийн хэмжээ ₮1.7 их наяд төгрөгт хүрээд байна. Энэ нь төлөвлөгөөнөөс давсан үзүүлэлт боловч цаашид зээл олголт тогтвортой үргэлжлэх эсэх нь тодорхойгүй байдалд оржээ. 

Он гарсаар сар бүр ипотекийн зээл авсан хүний тоо болон зээлийн хэмжээ аажмаар өссөн ч долдугаар сард бууралт ажиглагдсан байна

Тухайлбал, энэ сард 1,281 хүн ипотекийн зээлд хамрагдаж, нийт ₮187.7 тэрбум төгрөгийн зээл олгогдсон бөгөөд үүнээс ₮118.3 тэрбумыг арилжааны банкууд, ₮69.3 тэрбумыг Монголбанк санхүүжүүлжээ. Нийт олгогдсон ₮1.733 их наяд төгрөгийн зээлээс ₮1.092 их наяд нь арилжааны банкны эх үүсвэрээс, ₮640.8 тэрбум нь Монголбанкны хөтөлбөрийн хүрээнд гарсан байна. 

Харин ипотекийн зээлийг санхүүжүүлэхэд чухал үүрэгтэй Үндэсний баялгийн сангийн хөрөнгө одоогоор бүрэн хэрэгжээгүй байгаа нь зээлийн үргэлжлэлд тодорхойгүй нөхцөл үүсгэж байна. 

Ийнхүү эх үүсвэрийн хүлээлт үүссэн нь ипотекийн зээл хүсэгч иргэдийн хувьд эрсдэл дагуулж, цаашдын санхүүжилтийн тогтвортой байдалд анхаарах шаардлагатайг харуулж байна.