Барилгын үйл ажиллагааны тусгай зөвшөөрөл олгох үйл ажиллагааг зохион байгуулахад хамтарсан түншлэгч мэргэжлийн холбоодын хурал болж Монголын Барилгын Үндэсний Ассоцици, Монголын Барилгын Инженерүүдийн Холбоо,  Монголын Барилгын Зураг Төсөл Зохиогчдын Холбоо, Монголын Барилгын Төсөвчдийн Холбоо, Монголын Барилгын Инженер Геологичдын Холбоо, Өргөн Тээвэрлэх Машин Төхөөрөмж Үндэсний Холбоо, Монголын Барилгын Гүйцэтгэгч Байгууллагуудын Холбоодын Ерөнхийлөгчид, удирдлагууд оролцож, барилгын үйл ажиллагааны тусгай зөвшөөрлийн 2025 оны төлөвлөгөөний биелэлт, гүйцэтгэл болон шинээр нэвтрүүлж байгаа зөвшөөрлийн цахим нэгдсэн систем lisence.mn цахим системтэй танилцаж, цаашдын хамтран зохион байгуулах ажлуудын талаар хэлэлцэж тохирлоо. 

МБҮА ТББ нь түншлэглэгч мэргэжлийн холбоодыг төлөөлөн төрийн чиг үүргийг хэрэгжүүлэн  барилгын үйл ажиллагааны тусгай зөвшөөрөл олгох төрийн чиг үүргийг 8 дахь жилдээ амжилттай зохион байгуулж байгаа бөгөөд үйл ажиллагааг жилээс жилд сайжруулан ил тод, түргэн шуурхай, илүү хялбар болгохын төлөө санал санаачилга гарган ажиллаж ирлээ. 

Барилгын үйл ажиллагааны тусгай зөвшөөрөл олгох суурь нөхцөл шаардлагыг шинэчлэн хөнгөвчилсний зэрэгцээ цахим программ хангамжыг шинэчлэн аж ахуйн нэгжүүдийн хүсэлтийг тусгай зөвшөөрлийн нэгдсэн сан license.mn -ээр дамжуулан авахад бэлэн болоод байна. 

Зөвшөөрлийн цахим нэгдсэн систем license.mn-д барилгын үйл ажиллагааны тусгай зөвшөөрөл олгох үйл ажиллагааг нэгтгэсэнээр аж ахуйн нэгж байгууллагуудын хувьд тусгай зөвшөөрөл олгох үйл ажиллагаа илүү түргэн шуурхай болж шаардлага хангасан бол хүсэлт илгээснээс хойш 5 хоногт тусгай зөвшөөрлийн гэрчилгээ болон гэрээг QR кодтой шууд хүлээн авах боломжтой болох юм.

Барилгын үйл ажиллагааны тусгай зөвшөөрөл авахад хүндрэлгүй, хялбар шуурхай болж байгаа ч тусгай зөвшөөрөл эзэмшигч компаниудын тоо нэмэгдэж, чанаргүй барилга барих, барилгын талбайд ХАБЭА-н хууль дүрэм мөрдөхгүй байх, иргэд захиалагчдыг хохироох зэрэг зөрчил гарсаар байна. 

Иймд түншлэглэгч ТББ-ууд барилгын чанар аюулгүй байдлыг хангахад түлхүү анхаарч, хамтарсан сургалт арга хэмжээ зохион байгуулах, барилгын тусгай зөвшөөрөлтэй ААНБ-д тавих хяналтыг нэмэгдүүлж ажиллахаар боллоо.