Улаанбаатар хотын Баянзүрх дүүргийн 26 дугаар хороонд байрлах 207 дугаар байрны буулгалтын ажил албан ёсоор эхэллээ. Өнгөрсөн оны нэгдүгээр сард хий тээвэрлэж явсан автомашины дэлбэрэлтийн улмаас тус байр ноцтой эвдэрч, дахин засварлах боломжгүй гэсэн улсын байцаагчийн дүгнэлт гарсан тул нийслэлийн Засаг даргын захирамжаар уг барилгыг нураахаар болсон юм.

Буулгалтын ажлыг “Барилгын хатуу хог хаягдлыг дахин боловсруулах үйлдвэр” нийслэлийн өмчит аж ахуйн тооцоот үйлдвэрийн газар гүйцэтгэж байна. Тус газрын дарга Ц.Болдын мэдээлснээр барилгыг 30 хоногийн хугацаанд бүрэн буулгахаар төлөвлөсөн бөгөөд эхний ээлжид гараар цэвэрлэгээ хийж, 13 дугаар давхраас эхлэн бүтээцийг буулгана. Дараа нь жижиг механизм ашиглан бетоныг хөрөөдөх, арматур хуваах зэрэг ажлыг гүйцэтгэж, хамгийн сүүлд 70 тоннын кран ашиглан барилгын үндсэн бүтээцүүдийг буулгах юм.

Барилгын ойролцоо сургууль болон аж ахуйн нэгжүүд байрладаг тул хөдөлмөрийн аюулгүй байдлыг хангах, орчны иргэдийг хамгаалахад онцгойлон анхаарч байгаа аж. Ойр орчмын явган зорчигч, автомашины хөдөлгөөнд аюул учруулахгүйн үүднээс хамгаалалтын хашаа, саравч байрлуулсан байна.

207 дугаар байрны буулгалтад 2.4 тэрбум төгрөг зарцуулахаар төлөвлөсөн бол шинэ байр барихад 12.3 тэрбум төгрөг шаардлагатай гэж тооцоолжээ.

Энэхүү хөрөнгийг эхлээд нийслэлийн төсвөөс санхүүжүүлж, шүүхийн шийдвэр гарсны дараа гэм буруутай этгээдээс нөхөн төлүүлэх арга хэмжээ авах юм. Мөн тус байрны оршин суугчид өнөөдрийг хүртэл түрээсийн байранд амьдарч байгаа бөгөөд тэдний байрны түрээсийн зардлыг нийслэлээс бүрэн хариуцаж байгаа талаар холбогдох албаныхан мэдээллээ.