Монгол Улсад барилгын салбар үүсэж хөгжсөний 99 жилийн ойд зориулсан “Барилгачдын өдөр-2025” тэмдэглэлт арга хэмжээ 2025 оны 9 дүгээр сарын 5-ны өдөр Нийслэлийн Соёлын төв өргөөнд болж өндөрлөлөө. Арга хэмжээг Хот байгуулалт, Барилга, Орон сууцны хөгжлийн яам болон “Барилгын хөгжлийн төв” ТӨҮГ хамтран зохион байгуулсан бөгөөд барилгын салбарын удирдлагууд, инженер техникийн ажилчид, 21 аймгийн аж ахуйн нэгж, байгууллагын төлөөлөл өргөнөөр оролцов.

Нээлтийн үеэр Хот байгуулалт, Барилга, Орон сууцны сайд Э.Бат-Амгалан үг хэллээ. Тэрбээр барилгын салбар нь зөвхөн барилга байгууламж барих үйл явц биш бөгөөд хүн амын амьдрах орчныг бүрдүүлж, орон сууц, ажлын байр, дэд бүтэц, нийтийн үйлчилгээний хүртээмжийг шийдэх төр-хувийн хэвшлийн хамтын бүтээл болохыг онцлов.

Мөн тэрээр барилгын тусгай зөвшөөрлийн үйл ажиллагааг өнөөдрөөс эхлэн цахим системд бүрэн шилжүүлж, licence.mn буюу E-Mongolia платформоор дамжуулан олгодог болсныг мэдэгдэв. Ингэснээр өмнө нь 21 хоног зарцуулдаг байсан тусгай зөвшөөрлийг 3 хоногийн дотор авах боломж бүрдсэн байна.

Түүнчлэн 2026 онд Монголын барилгын салбарын 100 жилийн ой тохиох бөгөөд энэ ойг зөвхөн тэмдэглэлт баяр бус, салбарын шинэчлэлийн стратегийн эргэлтийн цэг болгон хэрэгжүүлэхийг зорьж байгаагаа илэрхийлэв. Тэрбээр мөн барилгын салбарын хууль эрх зүйн шинэчлэлийн хүрээнд хэд хэдэн багц хуулийг боловсруулаад байгааг танилцуулсан. Үүнд:

• Барилгын ерөнхий хууль
  

• Хот байгуулалтын тухай хууль
  

• Орон сууцны ашиглалтын тухай хууль
  

• Үндэсний орон сууцжуулалтын тухай хууль
  
  

Дээрх хуулиудын шинэчилсэн найруулгыг боловсруулж, Намрын чуулганаар өргөн барихаар төлөвлөжээ.

2025 оны 12 дугаар сар гэхэд зураг төслийн магадлалыг цаасаар хүлээн авдаг хуучин тогтолцоог халж, IFC болон PDF форматаар цахимаар хүлээн авдаг шинэ системд бүрэн шилжүүлэхээр ажиллаж байна.

Мөн барилгын салбарын бодлогын хүрээнд:

• “Барилгын материалын үйлдвэрлэлийг дэмжих хөтөлбөр”-ийг боловсруулан, энэ оны 9 дүгээр сард Засгийн газарт өргөн мэдүүлэх
  

• Орон сууцжуулалтын банк байгуулах ажлыг эхлүүлж, урт хугацааны, хямд эх үүсвэр бүхий санхүүжилтийн тогтолцоог бүрдүүлэх
  

• Дулаалгын барилгын материал, түүхий эдийг НӨАТ-аас чөлөөлөх хуулийн төслийг боловсруулж, энэ онд багтаан шийдвэрлүүлэх ажлуудыг хэрэгжүүлэхээр төлөвлөжээ. 

Арга хэмжээний үеэр 2025 оны барилгын салбарын шилдэг аж ахуйн нэгж, байгууллагуудыг шалгаруулан цом, өргөмжлөл гардуулсан бөгөөд дараах компаниуд шилдгээр тодорлоо. Барилга угсралтын чиглэлээр “Биг Монголия Билдинг” ХХК, “Актив Гарден” ХХК, инженерийн шугам сүлжээний чиглэлээр “Макс Өргөө” ХХК, барилгын материалын үйлдвэрлэлийн чиглэлээр “Пирамид Индустри” ХХК, “Монцемент Билдинг Материалс” ХХК, зураг төсөл, хот байгуулалтын чиглэлээр “Эн Эй Ди Эм Си” ХХК, “Эн Эй Ги Групп” ХХК, “Нодтранс” ХХК, нийтийн аж ахуйн чиглэлээр “Дөрвөлж” ОНӨААТҮГ, хөдөлмөрийн аюулгүй байдал, эрүүл ахуйн чиглэлээр “Монкон Констракшн” ХХК тус тус шалгарлаа.

“Барилгачдын өдөр-2025” нь салбарын хөгжлийг эргэн харж, ирээдүйн чиг хандлагаа тодорхойлох, төр-хувийн хэвшлийн хамтын ажиллагааг бэхжүүлэх, шилдэг байгууллагуудыг алдаршуулсан чухал арга хэмжээ боллоо. Ирэх 2026 онд тохиох 100 жилийн ойг угтан салбарын бүх түвшний байгууллагууд илүү хариуцлагатай, инновацид суурилсан, тогтвортой хөгжлийг эрхэмлэх шинэ эринд хөл тавихыг зорьж байна.