Сэлбэ хотын орон сууцжуулах төслийн 3, 4 дүгээр багц тендерийг задалж, таван багцаар зарласан бөгөөд тендерийн үр дүнд таван компани шалгарлаа. 

Тус тендерт дотоодын 17, гадаадын 17 аж ахуйн нэгж оролцож, нийт 64 санал ирүүлсэн байна. Шалгарсан компаниуд Сэлбэ хотод 5000 орчим айлын орон сууц барих бүтээн байгуулалтыг гүйцэтгэнэ.

Багц 3.1-д “China Construction Fifth Engineering Bureau” компани шалгарсан бөгөөд тус багц нь 71 айлын есөн давхар 11 блок орон сууцны иж бүрэн цогцолбор хороолол барих ажил юм. Багц 3.2-т “Моринсувд” ХХК шалгарч, мөн 71 айлын есөн давхар 12 блок орон сууц барихаар болсон. Багц 3.3-т “Нутгийн буян” ХХК шалгарч, 14 блок бүхий 71 айлын есөн давхар орон сууцны хорооллыг барих эрх авсан байна. Харин багц 4.1-д “Монкон” ХХК 16 блок орон сууцны барилгын ажлыг гүйцэтгэхээр болсон бол багц 4.2-д “Професионалстрой” ХХК 71 айлын есөн давхар зургаан блок болон 12 давхар найман блок орон сууцны иж бүрэн хорооллыг барихаар шалгарлаа.

Түүнчлэн Чингэлтэй, Сүхбаатар дүүргийн 158 га талбайд, 2206 нэгж талбайг хамарсан “Сэлбэ 20 минутын хот” төслийн хүрээнд нийт 8565 өрхийн 113 блок орон сууц, 8 км авто зам, 39 км явган хүний зам, 23 км дугуйн зам, 3.6 га тоглоомын талбай, гурван сургууль, таван цэцэрлэг, эмнэлэг болон спортын байгууламж баригдана. 

Мөн нийт талбайн 40 хувьд ногоон байгууламж төлөвлөгдсөн бөгөөд эхний 4000 айлын орон сууцны барилга угсралтын ажил одоогоор үргэлжилж байна.