Улаанбаатар хотын төвд байрлах хэт хуучин орон сууцны дахин барилгажуулах, шинэ барилгын өндрийг тогтоох талаар иргэдийн санал авах ажлыг нийслэлийн Хот байгуулалтын алба болон Нийслэлийн Засаг даргын Тамгын газрын дэмжлэгтэйгээр эхэллээ.

Бага тойруу, Их тойруу орчмын бүс нь Улаанбаатар хотын түүх, соёл, архитектурын үнэт өвийг хадгалсан онцгой бүс нутаг юм. Гэвч энэхүү бүсэд өнөөдөр ашиглалтын шаардлага хангахгүй, насжилт өндөртэй нийт 376 барилга байгааг мэргэжлийн байгууллагууд тогтоосон бөгөөд үүнээс 40-50 барилга нь төвлөрсөн байршилд байрлаж байгаа нь иргэдийн амьдрах орчин, аюулгүй байдалд бодитойгоор сөргөөр нөлөөлж байна.

Эдгээр барилга нь ихэвчлэн 40-50 жилийн өмнө баригдсан бөгөөд газрын хөрсний чийг, байгаль цаг уурын нөлөө, тухайн үеийн зураг төслийн стандарт зэргээс хамааран өнөөдөр техник, инженерийн хувьд осол, аюулын эрсдэлтэй болсон байна. Иймээс энэ бүсэд хамаарах барилга, байгууламжийг үе шаттайгаар шинэчлэх, дахин төлөвлөх, түүхэн барилгын хувьд сэргээн засварлах бодлого баримтлах шаардлагатай байна. Тиймээс Улаанбаатар хотын Хот байгуулалтын алба энэхүү хуучин барилгуудыг дахин төлөвлөх, барилгын өндрийг зохистой тогтоох замаар хотын өнгө төрхийг сэргээж, орчныг илүү аюулгүй, таатай болгох ажлыг эхлүүлсэн юм.

Нийслэлийн Засаг даргын зөвлөлийн 2025 оны наймдугаар сарын 20-ны өдрийн хурлаар Сүхбаатар дүүргийн 4, 5, 6, 8 дугаар хороо, Чингэлтэй дүүргийн 1-6 дугаар хорооны Бага тойруугийн 243.3 га талбайд хот байгуулалтын үйл ажиллагаа явуулах асуудлыг хэлэлцэн баталсан бөгөөд уг ажлын хүрээнд иргэдээс санал авч байна.