Сэлбэ хотыг Улаанбаатар хотын Чингэлтэй, Сүхбаатар дүүргийн нутаг дэвсгэрийн 158 га талбайд барихаар төлөвлөсөн бөгөөд үүнээс 40 га талбайд төр, хувийн хэвшлийн хамтарсан бүтээн байгуулалт хийгдэх юм. 

“Сэлбэ 20 минут хот” төслөөр баригдах орон сууцны дундаж хэмжээ 68 м.кв байхаар тооцоолсон бөгөөд нийт 2200 гаруй нэгж талбарыг чөлөөлөхөөс одоогоор 93 хувийн гүйцэтгэлтэй үргэлжилж байна.

Төслийн хэрэгжилтийн явц, хөрөнгө оруулалтын боломж, хамтын ажиллагааны талаар мэдээлэл солилцох уулзалт зохион байгуулагдаж, барилгын салбар, банк санхүү, бизнесийн байгууллагуудын төлөөлөл оролцлоо. Энэ үеэр хөрөнгө оруулагчид газар чөлөөлөлтийн явц, ногоон байгууламжийн шийдэл болон үерийн эрсдэлээс хэрхэн сэргийлэх талаар асуулт тавьсан байна.

“Сэлбэ 20 минут хот корпорац” ХХК-ийн гүйцэтгэх захирал У.Баатар хэлэхдээ, “Усны асуудалд нухацтай хандаж байгаа. Азийн хөгжлийн банкны санхүүжилтээр 800 мм-ийн шугам татсан бөгөөд Сэлбэ голын 12 байршилд даланг өргөтгөх төсөв батлагдсан. Мөн далан, ус зайлуулах шугамын ажлыг өндөр түвшинд төлөвлөсөн” хэмээн онцоллоо.

Тэрбээр мөн “Хувийн хэвшилтэйгээ уг төсөлд хамтран ажиллаж, аль болох богино хугацаанд 20 минут хот концепцыг бий болгож, бизнесийн зарчимд тулгуурлан харилцан ашигтай, шуурхай ажиллах зорилготой. Хамтран ажиллах бүсэд хөрөнгө оруулалтыг татах, бүтээн байгуулалтыг хувийн хэвшлийн оролцоотойгоор өрнүүлэхэд бэлтгэж байна” гэдгийг нэмэгдүүлэв.