Хотын хэмжээнд орон нутгийн өмчит болон хувийн хэвшлийн нийт 47 байгууллага орон сууц, нийтийн аж ахуйн чиглэлээр үйл ажиллагаа явуулж байгаа бөгөөд тэдгээрийн гүйцэтгэж буй нийт 70,499 ажлын хүрээнд 61.96 тэрбум төгрөгийн санхүүжилтээр өвөлд бэлтгэхээр төлөвлөжээ. 2025 оны наймдугаар сарын 14-ний байдлаар 14.82 тэрбум төгрөг зарцуулж, 38,961 ажил гүйцэтгэсэн байна.

Дулаан хангамжийн бэлтгэл ойролцоогоор 60 хувьтай, Улаанбаатар дулааны сүлжээ ТӨХК-ийн шугамын засварын ажил 53 хувьтай, орон сууцны дотоод засварын ажил 40 орчим хувьтай байна. 

Мөн инженерийн дэд бүтцийн хүрээнд төлөвлөгдсөн 750 гаруй төсөл, арга хэмжээ хэрэгжиж байгаа бөгөөд дулааны гол шугамын шинэчлэл, угсралтын ажил 37.5 хувь, ус хангамж, бохирын төслүүд 28 хувь, ТЗБА ажлууд 20.6 хувийн гүйцэтгэлтэй байна.

Хот байгуулалт, Барилга, Орон сууцны сайд Э.Бат-Амгалан 2025 оны наймдугаар сарын 12-ны өдөр 87 байгууллагын оролцоотой цахим хурал зохион байгуулж, өвөлжилтийн бэлтгэлийг аравдугаар сарын 20-ны дотор бүрэн дуусгах чиглэл, үүргийг холбогдох байгууллагуудад өгсөн. Үүний дагуу нийслэлийн хэмжээнд инженерийн байгууламж, орон сууц, нийтийн аж ахуйн бэлтгэл ажлыг эрчимжүүлэн ажиллаж байна.

Ирэх өвлийг өнтэй давах нөхцөлийг бүрдүүлэхийн тулд салбар бүрийн ажлуудыг цаг хугацаанд нь дуусгах, гүйцэтгэлийг сайжруулах шаардлага хэвээр байна. Орон сууцны дотоод засвар, шугам сүлжээний шинэчлэл зэрэг ажлуудын явц харьцангуй удаашралтай байгаа тул холбогдох байгууллагуудын хариуцлагыг өндөржүүлэн, хамтын ажиллагааг сайжруулах нь чухал байгааг албаныхан онцолж байна.