Монголбанк ипотекийн зээлийн тогтолцоог шинэ шатанд гаргах зорилгоор “Ипотекийн банк” байгуулах асуудлыг судалж, холбогдох бүтэц, шаардлагын талаарх санал, дүгнэлтийг Засгийн газарт хүргүүлжээ.

Энэхүү ажлын хүрээнд Засгийн газраас байгуулагдсан ажлын хэсэг судалгаа, шинжилгээний ажлыг гүйцэтгэж байгаа бөгөөд цаашид Азийн Хөгжлийн Банктай (АХБ) зөвлөх үйлчилгээний түвшинд хамтран ажиллах боломжтой гэж үзэж байна.

Монголбанк орон сууцны санхүүжилтийг урт хугацаанд тогтвортой хэлбэрт оруулах зорилгоор ипотекийн тусгай зориулалтын банкны загварыг судалж байгаа юм. Ийм төрлийн банк БНСУ зэрэг улсуудад амжилттай хэрэгжиж байгаа бөгөөд тус улсын жишээгээр нийт орон сууцны борлуулалтын 30-40 хувь нь ипотекийн банкны санхүүжилтээр хийгддэг байна.

Ипотекийн банк байгуулах нь иргэдэд урт хугацааны, хүү багатай зээл олгох боломжийг нэмэгдүүлж, орон сууцны зах зээлийн хөгжилд эерэг нөлөө үзүүлэх чухал алхам гэж үзэж байна.