Шведийн эрх баригчид найман жилийн турш нарийн тооцоо, төлөвлөгөөний дагуу Кируна хотод байрлах 100 гаруй жилийн настай сүмийн барилгыг нүүлгэн шилжүүлэх ажлыг өнгөрсөн мягмар гарагт эхлүүлжээ.

1912 онд баригдсан, 672 тонн жинтэй улаан модон барилга нь Шведийн хамгийн үзэсгэлэнтэй барилга байгууламжийн нэгээр нэрлэгддэг. Барилгын суурь байрлаж байсан газар нурах эрсдэлтэй болсон тул 5 км зайд байрлах аюулгүй шинэ байршилд шилжүүлэн байршуулах ажиллагаа 2 өдөр үргэлжлэх аж. 

Түүхэн сүмийн нүүлгэн шилжүүлэлтийг үзэж сонирхохоор Кируна хотын гудамжинд 10 мянга гаруй иргэн цугларсан байна. Уг ажлыг хэрэгжүүлэхэд Шведийн Засгийн газар нийт 52 сая ам.доллар (179.4 тэрбум төгрөг)  төсөвлөсөн бөгөөд төслийг өндөр нарийвчлалтайгаар гүйцэтгэж байна.