Тансаг зэрэглэлийн орон сууцны 1 м.кв-ын дундаж үнэ 6.6 сая төгрөг, энгийн орон сууцны үнэ 3.8 сая төгрөгт хүрсэн байна. 

Үл хөдлөх хөрөнгө зуучлалын байгууллагууд 2025 оны хоёрдугаар улиралд нийт 5466 хэлцэл байгуулж, 2.29 сая м.кв талбай бүхий хөрөнгийг 1398.3 тэрбум төгрөгөөр зуучлан борлуулжээ. Энэ нь өмнөх оны мөн үетэй харьцуулахад талбайн хэмжээ 2.7, үнийн дүн 10.3 хувиар өссөн үзүүлэлт юм.

Борлуулсан орон сууцны 45.1 хувь нь 51-100 м.кв, 20 хувь нь 50 м.кв-аас доош, 20 хувь нь 101-200 м.кв, үлдсэн 14 хувь нь 201 м.кв-аас дээш талбайтай байна. Түрээсийн зах зээлд 313.3 мянган м.кв талбай бүхий үл хөдлөх хөрөнгийг 125.6 тэрбум төгрөгөөр зуучлан түрээслүүлсэн нь талбайн хэмжээгээр 0.3 хувиар буурсан ч, үнийн дүнгээр 21.7 хувиар өсчээ.

Салбарын нийт хөрөнгө 225.5 тэрбум төгрөг бөгөөд үүний 167.5 тэрбум нь эргэлтийн хөрөнгө байна. Өр төлбөр 181.2 тэрбум, эздийн өмч 44.3 тэрбум төгрөг байна.