Хятад Улсын үл хөдлөх хөрөнгийн зах зээлийн хямрал улам гүнзгийрч, дотоод эдийн засгаа даван бүс нутгийн улс орнуудад ч сөрөг нөлөө үзүүлж эхэллээ. Сүүлийн саруудад тус улсын томоохон хотуудад шинэ орон сууцны үнэ тасралтгүй буурч байгаа бөгөөд зөвхөн долдугаар сарын байдлаар 0.31 хувиар унасан нь өнгөрсөн 9 сарын хамгийн огцом уналтад тооцогдож байна. Үл хөдлөхийн зах зээл бүхэлдээ “хүлээлтийн горимд” орж, хэрэглэгчийн итгэл эрс буураад байна.

Барилгын салбар дахь хөрөнгө оруулалт 2020 оны цар тахлын эхний давалгаанаас хойших хамгийн доод түвшинд хүрээд байна. Үүнийг дагаад салбарын томоохон тоглогчдын нэг, олон улсын зээлдэгчдийн итгэлийг дааж явсан China Evergrande компанийн хувьцаа Хонконгийн хөрөнгийн биржээс хасагдаж, системийн эрсдэлийг улам даамжрууллаа.

Хятадын засгийн газраас ипотекийн хүүг бууруулах, орон сууцны борлуулалтыг дэмжих бодлого хэрэгжүүлж байгаа ч хэрэглэгчдийн итгэлийг сэргээхэд хангалтгүй байна. Үүний улмаас банкны зээл олголт буурч, нийт зээлийн хэмжээ 20 жилийн дараа анх удаа агшсан үзүүлэлт бүртгэгджээ.

Тус улсын үл хөдлөх хөрөнгийн зах зээлд үүсээд буй энэ нөхцөл байдал Монгол Улсад ч мэдэгдэхүйц нөлөө үзүүлж эхэлсэн. Барилгын салбарын уналт нь Хятадын ган, цемент, коксжих нүүрсний хэрэгцээг бууруулахад хүрч, манай улсын экспортын хэмжээ, төсвийн орлого, аж үйлдвэрийн салбарт тодорхой дарамт үүсгээд байна.