Барилгын материалын чанар, аюулгүй байдлыг хилийн боомт дээр шуурхай шалгах боломжийг бүрдүүлэх түргэвчилсэн лабораторийн тоног төхөөрөмжийг Замын-Үүдийн боомтод суурилуулж дуусжээ.

Хот байгуулалт, Барилга, Орон сууцны сайд Э.Бат-Амгалан бусад холбогдох албаны мэргэжилтэнгүүд Дорноговь аймагт ажиллаж, барилгын материалын сорилт шинжилгээний түргэвчилсэн лабораторийн үйл ажиллагааны явцтай танилцлаа.

Уг лаборатори нь жилдээ 4500 гаруй аж ахуйн нэгж, 500 орчим иргэн импортоор оруулж ирдэг барилгын материалд 128 нэр төрлийн үзүүлэлтээр химийн найрлага, чанар, стандартын шаардлага хангаж буй эсэхийг газар дээр нь тодорхойлох боломжтой өндөр хүчин чадалтай.

Лабораторийн тоног төхөөрөмжийн суурилуулалт дууссан бөгөөд 2026 оны эхний улиралд бүрэн ашиглалтад орж, шинжилгээний үйл ажиллагаагаа эхлэхээр "Барилгын хөгжлийн төв" ТӨҮГ-аас бэлтгэл ажлыг хангаж байна.

Энэхүү лаборатори ашиглалтад орсноор импортын барилгын материалын чанарыг түргэн хугацаанд, найдвартай, ил тод хянах нөхцөл бүрдэж, зах зээлд чанаргүй бүтээгдэхүүн нэвтрэхээс сэргийлэх чухал дэвшил болно гэж холбогдох албаныхан онцолж байна.