Хоёр жил тутам Венец хотод зохион байгуулагддаг, архитектурын салбарын томоохон олон улсын үзэсгэлэн, арга хэмжээ болох "Биеннал"-д Исландын архитекторууд галт уулын лаваар барилгын материал үйлдвэрлэж, ирээдүйн хотыг бүтээх боломжийн талаар шинэлэг шийдэл танилцууллаа.

Архитектор Арнхильдур тэргүүтэй S.AP архитектурын багийн “Lavaforming” нэртэй төсөл нь байгальд ээлтэй, орон нутгийн нөөцөд тулгуурласан барилгын шинэ аргачлалыг санал болгож байгаа юм.

Төслийн хүрээнд тэд галт уулын халуун лавыг хөргөх замаар барилгын бүтэц, хэлбэрт оруулах үзэл баримтлалыг боловсруулжээ. Мөн лабораторид дахин хайлуулсан лаваар барилгын блок, багана хэлбэрийн туршилтын бүтээлүүдийг гаргасан байна. Эдгээр нь бат бөх, гялалзсан хар өнгөтэй, дахин боловсруулах боломжтой материалаар хийгдсэн бөгөөд уламжлалт барилгын материалтай өрсөлдөхүйц шинж чанартай гэж үзэж байна.

“Lavaforming” төслийг танилцуулсан павильон гурван хэсгээс бүрддэг бөгөөд лавын физик шинж чанар, инженерчлэлийн шийдлүүд, уран зөгнөлт ирээдүйн хотуудын дүрслэл зэргийг мультимедиа, загвар, баримтат өгүүлэмжээр дамжуулан үзүүлжээ.

Исланд нь галт уулын идэвхтэй бүс нутаг тул энэхүү төсөл нь тухайн орны байгалийн онцлогт тулгуурлан, барилгын салбарт тогтвортой, байгальд ээлтэй шийдэл эрэлхийлж буйг харуулж байна. 

Хэдийгээр санаа нь уран зөгнөл мэт боловч техник, материалын инновацийн хувьд цаашдын судалгаа, хөгжүүлэлтийн үндэс болохуйц төсөл хэмээн мэргэжилтнүүд үнэлж байна.