Мемфис хотын төвд сүндэрлэн орших Sterick Building нь нэгэн цагт АНУ-ын өмнөд бүсийн хамгийн өндөр барилгад тооцогдож байв. Теннесси мужийн энэхүү хот нь Миссисипи голын эрэг дээр оршдог бөгөөд хөгжим, соёл, түүхээрээ алдартай билээ. 1929 онд ашиглалтад орсон энэ 29 давхар барилга нь тухайн үедээ дотроо ресторан, банк, үсчний газар, эмийн сан, сүм гэх мэт бүхий л хэрэгцээг багтаасан “байшин доторх хот” гэж нэрлэгдэхүйц төв байжээ. Готик болон Art Deco хэв маягийг хослуулсан энэхүү барилга нь зөвхөн архитектураар төдийгүй, түүхэн үнэ цэнээрээ онцлог юм.

Хэдий тийм ч, 1960-аад оноос түрээслэгчид цөөрч, эцэстээ 1986 онд бүрэн орхигдсон. Барилгын газар болон бүтэц тусдаа өмчлөлийн дор байсан нь эрх зүйн маргаан үүсгэж, олон жилийн турш сэргээн засварлах ямар ч ажил хийгдээгүй байна. Барилгын гадна талын чулуун гоёл, дээврийн орой зэрэг чимэглэлүүд аюултай болсон тул авч хаяжээ. Гэсэн ч 1978 онд түүхэн дурсгалт барилга хэмээн албан ёсоор бүртгэгдсэн юм.

2023 онд тус барилга болон газрын өмчийг Constellation Properties компани нэгтгэн худалдан авч, шинэчлэлийн ажил эхлүүлж буйгаа зарласан. Одоогоор зочид буудал, орон сууц, ресторан зэрэг хосолсон зориулалттай төв болгон сэргээх зураг төсөл хийгдэж байгаа аж. Барилгын гадна талд LED гэрэлтүүлэг суурилуулан 40 жилийн дараа дахин гэрэлтүүлсэн нь сэргээн босголтын эхлэл боллоо гэж үзэж байна.

Sterick Building бол зөвхөн орхигдсон нэгэн барилга бус, хотын өнгөрсөн үе, уналт, дахин сэргэх итгэлийн бэлгэдэл болон хувирч байна.