Сингапурын домог болсон Marina Bay Sands цогцолбор нийт 27.6 их наяд төгрөг (8 тэрбум ам.доллар)-ийн өртөгтэй өргөтгөл хийхээр төлөвлөж байна. 

Энэ өргөтгөлөөр 55 давхар зочид буудлын шинэ барилга барьж, зочид буудлын өрөөний тоог нэмэгдүүлэхээс гадна 15,000 хүний суудалтай шинэ үзвэрийн танхим байгуулах юм. 

Үүнээс гадна шинэ казино, хурлын танхим, үзэсгэлэнгийн талбай нэмэгдэх бөгөөд өндөрт байрлах Skyloop гэх дээврийн цэцэрлэг, олон ресторан, усан сан зэрэг тусгай байгууламжийг бий болгоно. 

Төсөл 2025 онд эхэлж, 2031 онд бүрэн ашиглалтад орох төлөвтэй байгаа бөгөөд энэ нь Сингапурыг Азийн аялал жуулчлалын тэргүүлэх төв болгох зорилготой. 

Төслийн үр дүнд ажил эрхлэлтийг нэмэгдүүлэхээс гадна эдийн засагт чухал түлхэц болохоор байгаа бөгөөд орон нутгийн болон олон улсын жуулчдыг татах хүчин зүйл болно гэж шинжээчид үзэж байна.