Хот байгуулалт, барилга, орон сууцжуулалтын /ХББОС/  сайдын багцын 2026 оны хөрөнгө оруулалтын төсвийн төсөлд олон нийтээс санал авах танхимын хэлэлцүүлэг /2025.08.04/ боллоо. Тодруулбал, Монгол Улсын Ерөнхий сайд Г.Занданшатар 2026 оны төсвийн төслийг боловсруулахад Төсвийн тухай хууль, Засгийн газрын журамд заасан олон нийтийн оролцоог хангаж ажиллахыг  төсвийн ерөнхийлөн  захирагч нарт үүрэг болгосон. 

Энэ дагуу төсвийн төслийг боловсруулах үйл явцад иргэдийг оролцуулж, ил тод, нээлттэй төсвийн хэлэлцүүлгийг хийсэн нь энэ юм. 

Тус яамны Хот байгуулалт, орон сууцжуулалтын бодлого зохицуулалтын газрын хэлтсийн дарга Э.Батболд 2026 онд хэрэгжүүлэхээр төлөвлөж буй томоохон төсөл хөтөлбөрүүд, 2026 онд шаардлагатай улсын төсвийн санхүүжилтийн талаар танилцууллаа. 

Хот байгуулалт, барилга орон сууцжуулалтын салбарт улсын төсвийн хөрөнгөөр 2026 онд шилжин хэрэгжүүлэх 43 төсөл арга хэмжээ, шинээр хэрэгжүүлэх 43 барилга, байгууламж, тоног төхөөрөмжийн 2 төсөл, ТЭЗҮ зураг төсөв боловсруулах 19 төсөл буюу нийт 64 арга хэмжээнд 1 их наяд 366.9 тэрбум төгрөгийн төсөвт өртөг бүхий  ажил байгаагаас 2026 онд 592.7 тэрбум төгрөгийн санхүүжилт шаардлагатай гэсэн саналыг нэгтгэн төлөвлөж, хуулийн хугацаанд албан албан бичгээр болон цахим системээр хүргүүлжээ. 

2026 онд хэрэгжүүлэхээр төлөвлөж буй томоохон төсөл хөтөлбөрүүд нь: 

1. “Залуус-1“ орон сууцны хорооллын инженерийн дэд бүтэц

2. Аймаг, нийслэлийн инженерийн дэд бүтэц, шугам сүлжээ

3. 20 минутын хотын үзэл баримтлалыг хэрэгжүүлэх суурь судалгаа, төлөвлөлтийн зөвлөх үйлчилгээ, барилга байгууламж

4. Хархорум хотын төлөвлөлт зураг төсөл

Түүнчлэн тус салбарт 2024-2028 онд баримталж буй тэргүүлэх чиглэлээс дурдвал. 

📌Хот байгуулалт

Шинэ болон дагуул хотуудын төлөвлөлт, бүтээн байгуулалт

Гэр хорооллын газрын дахин төлөвлөн барилгажуулах 

📌Барилга, барилгын материал

Ногоон барилга

Барилгын материалыг дахин ашиглах

Дотоодын үйлдвэрийг дэмжих

📌Нийтийн аж ахуй, ИШС

Баталгаат ундны эх үүсвэр хангах

Бохир усыг зайлуулах цэвэршүүлэх, дахин ашиглах

Үерийн бэлтгэл арга хэмжээ 

📌Орон сууцны санхүүжилт 

Орлогод нийцсэн орон сууцны төслүүд 

Амины орон сууц

Санхүүжилтийн тогтвортой тогтолцоо 

📌Цахим систем

Хот байгуулалтын кадастерийн систем

Олон нийтээс санал авах үйл ажиллагаа 2025 оны наймдугаар сарын 1-нээс орон даяар эхэлсэн. Саналыг 11-11 төв, E-Mongolia апп болон яамдын цахим хуудсаар авна. Мөн олон нийтийн хэлэлцүүлгийг танхимаар энэ сарын 4-14-нд салбар бүрээр зохион байгуулна. Нийт 12 хэлэлцүүлэг болохоор төлөвлөж байгаа аж.