Монгол Улсын Засгийн газар иргэдийн амьдралын чанарыг дээшлүүлэх, агаарын бохирдлыг бууруулахыг нэн тэргүүнд тавьж байна. Ипотекийн зээлийн эрэлт ихэссэнтэй холбоотой иргэд 2-3 жил дугаарлаж буй асуудлыг шийдвэрлэхээр орлогод нийцсэн орон сууцны хөтөлбөрийг орон даяар хэрэгжүүлэх, санхүүжилт, зах зээлийн зохицуулалт, хууль эрх зүйн шинэчлэлийг хэрэгжүүлэхээр төлөвлөж байна.

Ерөнхий сайд Г.Занданшатарын захирамжаар байгуулагдсан Ажлын хэсэг орон сууцны санхүүжилтийн тусгай чиг үүрэгтэй банк байгуулах судалгаа явуулж, энэ сарын 25-нд Засгийн газрын хуралдаанд загвар болон санал, дүгнэлтийг танилцуулахаар бэлдэж байна. Ажлын хэсгийг ЗГХЭГ-ын дарга С.Бямбацогт ахалж, УИХ-ын гишүүн Л.Энх-Амгалан орлогчоор ажиллаж байна.