Улаанбаатар хотыг олон төвт бүтэцтэй хөгжүүлэх зорилтын хүрээнд Нийслэлийн Орон Сууцны Корпораци (НОСК) “Баянхошуу орон сууцжуулалт” төслийг амжилттай хэрэгжүүлж байна.

Энэхүү төсөл нь байгальд ээлтэй, эрчим хүчний хэмнэлттэй, ногоон хөгжлийг дэмжсэн томоохон бүтээн байгуулалтын нэг хэсэг бөгөөд нийт 60 орчим га талбайд хоёр үе шаттайгаар хэрэгжих юм. 

Төслийн хүрээнд Баянхошуу дэд төвийн 41.3 га талбайд 2,816 айлын, Шархадны бүсэд 19.2 га талбайд 2,184 айлын орон сууц барихаар төлөвлөжээ.

Одоогийн байдлаар Баянхошуу дэд төвийн эхний шатны бүтээн байгуулалт үргэлжилж, нийт 462 айлын орон сууцны барилга угсралтын ажил хийгдэж байна. Үүнээс:

• B15 талбарт баригдаж буй 110 айлын орон сууцны барилга угсралт 98 хувийн гүйцэтгэлтэй, улсын комисст хүлээлгэн өгөхөөр бэлдэж байна.

• B13-1 талбарт 150 айлын, B13-2 талбарт 76 айлын орон сууц 70 гаруй хувийн гүйцэтгэлтэй байна.

• B13-3 талбарт 126 айлын орон сууцны барилгын гүйцэтгэгчийг сонгон шалгаруулах ажил үргэлжилж байгаа юм.

Түүнчлэн төслийн хүрээнд инженерийн дэд бүтцийн ажил 90 хувийн, гадна орчны тохижилтын ажил 19 хувийн гүйцэтгэлтэй үргэлжилж байгаа бөгөөд иргэдийн амьдрах таатай орчныг бүрдүүлэхэд чиглэсэн бүтээн байгуулалт шат дараатай хийгдэж байна.