Fallingwater нь АНУ-ын Пенсильвани мужийн Баавгайн гол (Bear Run) голын дээр байрлах, архитектурын түүхэнд нэр алдар нь мөнхөрсөн байшин юм. 1935 онд архитектор Фрэнк Ллойд Райт-аар (Frank Lloyd Wright) зураг төслийг нь гаргуулсан энэ байшин нь усан дээр баригдсан хосгүй бүтээл юм. Уг байшингийн зохион байгуулалт, байгалийн зохицол нь XX зууны архитектурын оргилуудын нэгт зүй ёсоор тооцогддог.

Fallingwater нь Питтсбург хотод суурьшсан бизнесмэн Эдгар Кауфманн Ср. (Edgar Kaufmann Sr.)-ийн захиалгаар баригджээ. Тэрбээр гэр бүлдээ зориулж амралтын орон сууц бариулахыг хүссэн бөгөөд тухайн үед нас нь өндөр болсон ч нэр хүндээ хадгалж байсан Фрэнк Ллойд Райтэд хандсан байна.

1935 онд анхны зураг төсөл нь гарч, 1936–1939 оны хооронд баригдсан. Байшингийн суурь нь ургаа хадан дээр шууд байрласан бөгөөд доогуур нь хүрхрээ урсдаг. Энэ нь Райтын “органик архитектур” буюу байгальтай зохицон барих философийг бодитоор харуулсан гол жишээ болсон юм.

Барилгын үндсэн материалд байгалийн чулуу, төмөр бетонон хавтан, шил, мод зэрэг байгальд зохицсон элементүүдийг ашигласан. 

Байшингийн өртөг тухайн цаг үедээ өндөрт тооцогдож байсан бөгөөд тавилга, зочны байр, туслах өрөө зэргийг бүгдийг хамруулбал нийтдээ ₮556 140 000 ($155,000) хүрсэн байна. Өнөөдрийн мөнгөөр энэ нь ойролцоогоор 10.76 тэрбум төгрөг ($2.5–3 сая ам.доллар)-тай дүйцэх хэмжээний хөрөнгө оруулалт юм.

Эдгар Кауфманн Jr., аавынхаа нас барсны дараа энэ байшинг өвлөж авсан бөгөөд 1963 онд Fallingwater-ийг Western Pennsylvania Conservancy (WPC) хэмээх байгаль хамгааллын байгууллагад хандивласан. Түүнээс хойш байшин олон нийтэд нээлттэй музей болон үйл ажиллагаа явуулж байна. 2001 онд анх удаа өнөөдрийн ханшаар ойролцоогоор 41.26 тэрбум төгрөг ($11.5 сая доллар)-ийн сэргээн засвар хийгдсэн бол, 2024–2026 онд дахин өнөөдрийн ханшаар ойролцоогоор ₮25.12 тэрбум ($7 сая)-ын төсөвтэй шинэчлэл хийгдэж байна.

Fallingwater нь зөвхөн нэг байшин биш, харин XX зууны архитектурын оргил, байгаль, уран барилга, хүний мэдрэмжийг нэгтгэсэн урлагийн бүтээл юм. Байгалийг эвдэлгүйгээр түүнийг ашиглаж, орон зайг шинэлэгээр харуулах чадвар нь Райтыг дэлхийн архитектурын түүхэнд мөнхрүүлжээ.

Өнөөдөр ч энэхүү байшин нь зочдын сонирхлыг татсан, сурган хүмүүжүүлэх зорилготой архитектурын музей болон ашиглагдсаар байна.