Шилийг дахин боловсруулах нь төвөгтэй, зардал өндөртэй процесс юм. Гэсэн хэдий ч 2023 оноос эхлэн Портсмутын их сургуулийн судлаачид энэ асуудлыг шийдэх шинэ аргыг боловсруулж, хаягдал шилийг нунтаглан барилгын зориулалттай шахсан хөрсний блок (Compressed Earth Blocks буюу CEB) үйлдвэрлэхэд ашиглаж байна.

Энэхүү технологи нь уламжлалт цементэн блокийг орлохуйц бат бөх чанартай бөгөөд цемент хэрэглээг бууруулж, барилгын салбарт байгальд илүү ээлтэй шийдэл болж буйг судалгаагаар баталжээ.

Судалгааны баг хаягдал шилийг 2 мм хүртэл нунтаглаж, шохойн чулууны хольцтой хослуулан блок хийсэн бөгөөд 28 хоногийн турш бат бөх байдлаа хадгалжээ. Тус блок 10% шил, 10% шохой агуулсан хувилбар нь хамгийн сайн үзүүлэлттэй байсан ба энгийн хөрсний блокоос 90%-иар илүү даралтын бат бөх, 30%-иар илүү сайн суналтын хүч даах чадвартай байжээ.

Төслийн удирдагч, профессор Даршини Кумарасена хэлэхдээ:

“Манай арга нь дахин боловсруулахад төвөгтэй хаягдал материалыг үр ашигтай, тогтвортой барилгын материал болгон хувиргах боломжийг харуулж байна. Энэ технологи хөгжиж буй орнуудад чухал шийдэл болно.” гэж онцолжээ.

2023-2025 оны хооронд Гана, Нигери, Их Британи зэрэг орны хэд хэдэн судалгааны байгууллага хамтран уг технологийг судалж, цаашид дулаан тусгаарлалт, эдэлгээний чанар зэрэг үзүүлэлтээр гүнзгийрүүлэн судлахаар төлөвлөж байна.