Монгол Улсын барилгын салбарт үр бүтээлтэй ажиллаж, салбарын хөгжил дэвшилд бодитой хувь нэмэр оруулсан зүтгэлийг нь өндрөөр үнэлж, Барилга МН-ийн үүсгэн байгуулагч, МБҮА-ийн Гүйцэтгэх захирал Ганчулууны Батсүхийг Монгол Улсын Ерөнхийлөгчийн зарлигаар “Хөдөлмөрийн гавьяаны улаан тугийн одон” - гоор   шагналаа.

Тэрээр 1999 оноос эхлэн барилгын салбарт засал чимэглэл, барилга угсралт, интерьер дизайн, барилгын төсөл, зөвлөгөө мэдээллийн чиглэлээр болон барилгын салбарыг соён гэгээрүүлэх ажлуудыг удирдан зохион байгуулж ажилласан. Тухайлбал, 2007 оноос барилгын салбарын хамгийн том платформ болох “Barilga.mn” сайтыг нээж, салбарын хууль эрх зүй, эдийн засаг, үнэ ханш, шинэ техник технологи, бүтээгдэхүүний талаарх салбарын цогц мэдээллийг ил тод, хүртээмжтэйгээр олон нийтэд хүргэсээр байна.

Түүнчлэн сар тутмын “Барилга МН” сэтгүүлийг 15 дахь жилдээ тасралтгүй эрхлэн гаргаж өдгөө 182 дахь дугаараа уншигчдадаа хүргээд байна. Энэхүү сэтгүүл нь Монгол Улсын 21 аймаг төдийгүй хилийн чанадад ч тогтмол уншигч, захиалагчидтай болсон нь түүний салбарын соён гэгээрүүлэх үйлсэд оруулсан үнэтэй хувь нэмрийг илтгэнэ. Мөн зөвлөгөө мэдээлэл, судалгааг нийтэд түгээн дэлгэрүүлэх ажлын хүрээнд “Амины орон сууц”, “Хаус дизайн”, “Интерьер дизайн” зэрэг цуврал каталог, Барилгын салбарын 90 жилд зориулан “Барилга, Үл хөдлөх хөрөнгийн судалгааны тайлан” зэрэг баримт, судалгаанд суурилсан бүтээлүүдийг эмхэтгэн гаргасан нь салбарын үнэт мэдээллийн сан болж байна. 

Тэрбээр өнгөрсөн хугацаанд барилгын салбарын 100 гаруй арга хэмжээг удирдан зохион байгуулсны дотор салбартаа хамгийн нөлөө бүхий “BARILGA EXPO” олон улсын үзэсгэлэн яармагийг 37 дахь удаагаа амжилттай зохион байгуулсныг онцлох нь зүйтэй юм. Түүнчлэн “Барилгын ханган нийлүүлэгчдийн чуулган”, “Construction Marketing”, “Construction market” зэрэг чуулган, форум, мэргэжлийн сургалтуудыг үе шаттайгаар зохион байгуулсан төдийгүй “Barilga Basketball”, “Барилга биллиард” зэрэг спортын уралдаан, тэмцээнүүдийг санаачлан зохион байгуулсан нь барилгын салбарын хамт олны эв нэгдэл, хамтын соёлыг хөгжүүлэхэд түүний ажлын бас нэгэн үнэтэй хэсэг билээ.

Сүүлийн жилүүдэд олон улсын барилгын салбарын бизнес эрхлэгчдийг холбох, хөрөнгө оруулалтыг нэмэгдүүлэх зорилгоор “Монгол, Хятадын барилгын бизнес эрхлэгчдийн чуулган”-ыг БНХАУ-ын барилгын чиглэлийн төрийн болон төрийн бус байгуулагуудтай хамтран амжилттай зохион байгуулж, хоёр орны бизнес эрхлэгчдийн хамтын ажиллагааны гүүрийг тавьж өгсөн. 

Барилгын салбарт эрчим хүчний хэмнэлттэй ногоон барилгын бодлогыг хэрэгжүүлэхэд идэвхийлэн оролцож Даян дэлхийн ногоон хөгжлийн байгууллагатай хамтран Монгол улсад ногоон барилгын бодлогод нийцсэн ногоон сургууль цэцэрлэгийн барилгын төслийн судалгаа, төслийн багт ажилласан бөгөөд ногоон, эрчим хүчний хэмнэлттэй барилгын зураг төсөл, судалгаа, мэргэжлийн зөвлөгөөг эмхэтгэн багтаасан гарын авлага, сэтгүүл, каталогийг олон нийтэд хүргэсэн. Монголын  нөхцөлд  нийцсэн,  үр  ашигтай  эрчим  хүчний шийдлүүдийг боловсруулан нэвтрүүлэх, хүлэмжийн хийн ялгарлыг бууруулах зорилгоор эрчим хүчний хэмнэлттэй барилга барих, дулаалах ажилд 300 гаруй жижиг дунд бизнес эрхлэгчид болон хувиараа хөдөлмөр эрхлэгчдийг цогц сургалтад хамруулж, 2000 гаруй амины орон сууцыг дулаалсан Жерес ОУ-ын байгууллагатай хамтран хэрэгжүүлж байгаа “Дулаан шийдэл төсөл” - ийг удирдан ажиллаж байна.

Барилгын материалын чанар, аюулгүй байдлыг сайжруулахад чиглэсэн бодлого, стандартын ажлуудыг төр болон хувийн хэвшлийн байгууллагуудтай хамтран хэрэгжүүлсэн. Жишээлбэл, Монгол Улсын Шадар сайд С.Амарсайханы ажлын алба, ХББОСЯ, Стандарт Хэмжил Зүйн Газар болон холбогдох төрийн бус байгууллагуудтай хамтран барилгын материалын чанар, аюулгүй байдлыг дээшлүүлэх шат дараалсан арга хэмжээг зохион байгуулсан нь энэ чиглэл дэх томоохон ажлуудын нэг юм.  Мөн салбарын бодлогын баримт бичиг, норм стандарт, дүрэм журамд үзлэг хийх ажлыг удирдан хэрэгжүүлсэн ба барилгын норм ба дүрмийг олон нийтэд үнэ төлбөргүй хүргэх саналыг холбогдох яаманд удаа дараа санал хүргүүлэн ажил хэрэг болгосны үр дүнд цахимаар үнэ төлбөргүй хүргэж байна.

Барилгын салбарын хууль эрх зүйн орчныг сайжруулах хүрээнд барилгын тухай хууль болон холбогдох дүрэм журам боловсруулах ажлын хэсгүүдэд ажиллаж,  бизнес эрхлэгчдэд тулгамдаж байгаа олон асуудлыг шийдвэрлэхэд гар бие оролцсон.

Тэрээр төрийн бодлогын баримт бичиг, алсын хараатай уялдуулан үйл ажиллагаа төлөвлөдөг нэгэн. Нийслэлийн хэт төвлөрлийг сааруулах, барилгын материалын ханган нийлүүлэлтийг нэмэгдүүлэх Засгийн газрын зорилтыг дэмжин, нийслэлд хамгийн ихээр барилгажиж байгаа баруун бүсэд “Барилгачин” барилгын материалын худалдааны төвийн төслийг санаачлан амжилттай хэрэгжүүлэн ажиллаж байна. 

Мөн салбарын бизнес эрхлэгчдийн эрх ашгийг хамгаалах, тэдэнд тулгамдаж буй асуудлыг шийдвэрлэх, дотоодын компаниудын оролцоог нэмэгдүүлэх чиглэлд онцгой анхаарал хандуулан ажилладаг бөгөөд төрийн байгууллагуудтай хамтран ажиллаж, олон чухал асуудлыг шийдвэрлүүлсэн. Энэ онд томоохон төсөл хөтөлбөр, Сэлбэ дэд төвийн тендерт дотоодын компаниудыг оролцуулах, эрх ашгийг хамгаалах чиглэлээр холбогдох төрийн байгууллагуудад хандан зохих үр дүнд хүрсэн нь түүний тууштай байр суурь, барилгын салбарын чухал төлөөлөл гэдгийг харуулсан юм. 

Барилгын салбарт бизнес эрхлэгчдийн тулгамдсан асуудлуудын нэг аливаа маргаан хууль шүүхийн байгууллагаар шийдвэрлүүлэхэд удаашралтай байдаг асуудлыг шийдвэрлэхээр Барилга, дэд бүтцийн олон улсын арбитрийн үйл ажиллагааг эхлүүлэхэд мөн өөрийн хувь нэмрийг оруулж ажилласан байна.

Түүнчлэн Олон улсын зөвлөх инженерүүдийн холбооны ФИДИК-ийн гэрээг Монгол Улсад албан ёсоор орчуулах эрхийн гэрээ байгуулах болон  ФИДИК-ийн гэрээний сургалтуудыг амжилттай зохион байгуулж, томоохон барилгын бүтээн байгуулалтын ажлыг олон улсын шаардлагад нийцсэн ФИДИК-ийн гэрээгээр гүйцэтгэх суурь нөхцөлийг тавьсан.

Мөн барилгын салбарын төрийн бус байгууллагыг чадавхжуулахад идэвхийлэн оролцож, төр хувийн хэвшлийн түншлэлийн хүрээнд төрийн зарим чиг үүрэг барилгын үйл ажиллагааны тусгай зөвшөөрлийн үйл ажиллагааг төрийн бус байгууллагаар гүйцэтгүүлэх ажлын  хэсгийг удирдаж эхлүүлсэн бөгөөд тусгай зөвшөөрлийн үйл ажиллагааг бизнес эрхлэгчдэд хүндрэлгүй, төрийн чиг үүргийг хүнд сурталгүй, хурдан хүргэх зорилгоор зохих журам дүрэмд өөрчлөлт оруулж, бүрэн цахим болгох ажлыг удирдан зохион байгуулж ажилласан.

Түүний барилгын салбарт 26 жилийн турш ажилласан уйгагүй хөдөлмөр, хичээл зүтгэл нь барилгын салбарын бодлого, хөгжил, мэргэжлийн соён гэгээрэл, нийгмийн хүртээмжтэй мэдээллийн орчныг бий болгоход үнэтэй хувь нэмэр оруулж, ийнхүү төрдөө үнэлэгдэн “Хөдөлмөрийн гавьяаны улаан тугийн одон”-гоор  шагнуулсан нь түүний  нөр их хөдөлмөр, гавьяаны тод илэрхийлэл юм.