Дэлхийд хамгийн томд тооцогдох усан цахилгаан станцын /УЦС/ барилгын ажил эхэлснийг Хятадын албаны хүмүүс мэдэгдлээ. 

Энэхүү УСЦ жилд 300 тэрбум киловатт цаг цахилгаан эрчим хүч үйлдвэрлэх хүчин чадалтай байх бөгөөд энэ нь одоогоор дэлхийд хамгийн том гэж тооцогддог “Саньшя” (Гурван хавцлын) УЦС-ын хүчин чадлаас гурав дахин их юм. Төслийн хөрөнгө оруулалтын нийт хэмжээ 1.2 их наяд юань буюу 167.2 тэрбум ам.долларт хүрнэ гэж тооцоолжээ. 

Хятадын эрх баригчид Төвөдийн өндөрлөгийн усан цахилгаан станцын эрчим хүчний нөөцийг ашиглах өргөн хүрээтэй стратегийн хүрээнд уг станцыг барих гэж байгаагаа анх 2020 онд зарлаж, таван жилийн төлөвлөгөөндөө тусгажээ. Энэхүү төлөвлөгөөг өнгөрсөн оны 12 дугаар сард албан ёсоор баталсан байна. 

Хятадын Гадаад хэргийн яам мэдэгдэхдээ, уг төсөл нь байгалийн гамшгийн эрсдэл, учрах уршгийг бууруулахад тус дөхөм болох бөгөөд голын доод хэсгийн сав газрын бүс нутгуудад уур амьсгалын өөрчлөлтөд дасан зохицох үйл явцад дэмжлэг үзүүлнэ гэсэн байна.